Тек қана қыздар!

Семей теміржолында спортты серік ететін қыз-келіншектер көп. Ұлттық компания көлемінде өтетін түрлі сайыстарда топ жарып жүргендердің де қатары мол. Өткен демалыс күні халықаралық әйелдер күні құрметіне қыздар қауымы өзара жолдастық кездесу өткізді.

Бөлімшенің кәсіподақ ұйымының ұйытқы болуымен өткен шарада нәзік жандар волейболдан өзара шеберлік сынасты. Семей және Жаңа-Семей станцияларының спортшы қыздары қатысқан жарыс жоғары деңгейде өтті. Алдымен сайыстың салтанатты ашылуы рәсімінде бөлімшенің кәсіподақ төрайымы Данагүл Өтеленова сөз алып, барша қыз-келіншектерді келе жатқан көктемнің шуақты мерекесімен құттықтап, сәттілік тіледі. 

– Басты мақсат – жеңіске жету емес, өзара достық қарым-қатынасты, әріптестер арасында сыйластықты нығайту, – деген Данагүл Айтқалиқызы спортты үнемі серік ету қыз-келіншектер қауымының дені сау болумен қатар сымбатының да арта түсуіне септігін тигізетінін тілге тиек етіп өтті. 

Ә дегеннен қызу қарқынмен басталған ойында Семей станциясының қыздары шеберліктерін байқатты. Жанкүйерлерінің қиқуымен жігерленіп, айқын басымдықпен жеңіске жол сала бастады. Әйтсе де, ойынның екінші жартысында жаңа-семейлік қыздар күш ала бастады. Салтанат Серікқан, Айнұр Атшабарова, Гауһар Шұңғылова, Айдана Мұсабаева, Фариза Амантаева сынды станцияның техкеңсе қыздары дүркін-дүркін шабуылға шығып, қарсыластарын қатты састырды. Ширақ қимылдап, ала допты қақпақыл қылған қыздар ойын барысын мейлінше қыздыра түсті. Нәтижесінде жоғары деңгейдегі даярлықпен келген Жаңа-Семей станциясының қыздары жеңіс тұғырына көтерілді. Жеңімпаз командаға арнайы мерекелік кубок тарту етілді. Сонымен қатар, сайыста өнер көрсеткен барлық қыз-келіншектер сый-сияпатқа ие болды.