Қазақстан чемпионатында теміржолшының баласы топ жарды
Маңғыстау облысы бойынша меншікті тілші
Жақында Алматыда өткен пара жеңіл атлетикадан Қазақстан чемпионатында теміржолшының баласы топ жарды. Маңғыстау қосалқы бөлімінде логистика бөлімін басқаратын Айбек Өтековтың ұлы Әлішер Құмарғалиев бірден қос медалді тағып, жоғары мінберге көтерілді.
Тірек-қимыл аппараты зақымданған жастар арасында болған бұл чемпионатта Маңғыстау құрамасында өнер көрсеткен спортшылар 4 алтын, 1 күміс жүлде иеленген еді. Командасына соның бір алтыны мен бір күміс медалін Әлішер сыйлады. Ол 35 класс бойынша 100 метрді бағындыруда бірінші орын, 200 метрде екінші орыннан көрінді. Баласының жеңісіне бәрінен бұрын қуанған әкесі оның әлі талай белестерді бағындырып, биік-биік тұғырлардан көрінуіне еш күмәні жоқ екенін айтады. Өйткені Әлішердің бойында спортшыға тән табандылық та, қайтпас қайсарлық та бар. Дайындалудан, өзін шыңдаудан жалықпайды, дейді әкесі.
Осындай өзінің мүмкіндігі шектеулі болуына қарамастан мүмкіндіктің шектеусіздігін дәлелдеп жүрген жас спортшының өсіп келе жатқанын көріп біліп жүрген теміржолшылар да оның жетістігіне риза. Теміржолшы отбасында тәрбиеленіп жатқан жеткіншектің жеңісі барлық теміржолшының жеңісі деп біледі.
