Семейлік теміржолшылар арасында асық атудан тұңғыш рет сайыс өтті

Семейлік теміржолшылардың арасында ұлттық спорттық ойындардан жарыс өтіп жатыр. Жуырда кәсіподақ ұйымының ұйытқы болуымен асық атудан ерекше сайыс өтіп, кіл «сұрмерген» шеберлерді анықтады.

Асық ату – еліміз бойынша ұлттық спорт түрлерінің қатарына қосылғанымен, ел шығысына енді ғана келіп жатыр. Теміржолшылар арасында да сайыс тұңғыш рет өткізілді.  

Дәлдік пен шеберлікті қажет ететін асық ату ойынының өзіндік ережелері бар. Арнайы шақырылған төрешілер қауымы қойылар талаппен таныстырып өткен соң, ерлер мен әйелдер екіге бөлініп ойынды бастады. Бірнеше топ өзара сайысқа түсіп, жеңімпаздар іріктеліп отырды.  

Басты міндет – сақамен дәл көздеп тізілген асықтардың бірін немесе бірнешеуін шеңберден шығарып жинау. Кім көп асық ұтып алады – сол жеңімпаз.  

Әйелдер арасында асықты қолына алғаш ұстағандар да, бала кезден асықты серік еткен нәзік жандар да бар екен. Семей станциясы қызметкері Гүлжан Қабдуллина бірінші орынды жеңіп алса, оның әріптесі Салтанат Қайрамбаева екінші орынды иеленді. Жалпы, станция қыздары ұлттық спорттың осы түрінен басым екендіктерін ойын барысында дәлелдеп үлгерді. Сол тәрізді НЖС-6 қыздары мен Әйгерім Тоқпанова бастаған «Транстелеком» АҚ Семей филиалының қыздары да ұлттық спорттың осы түрінен оларға шебер бәсекелес бола білді.  

Ал ерлер арасында алдына қара салмаған Семей вагон пайдалану депосының теміржолшылары болды. Бірінші орынды Абылай Амангелдин иеленсе, екінші орынға оның әріптесі Мұрагер Қасымханов лайық деп танылды. Барлық жеңімпаздар кәсіподақ ұйымы тарапынан әзірленген ақшалай сыйлық пен арнайы марапат қағаздарын иеленді. Енді барлық жеңімпаздар алдағы уақытта Көкшетау өңірінде өтетін республикалық сайыста Абай елінің намысын қорғайтын болады. Олар жаттығуды қазірден бастап кетті.