Арыста құрметті теміржолшыны еске алу турнирі өтті
Арыс қаласындағы Игібай спорт кешенінде құрметті теміржолшы Мәткерім Тұрысбековті еске алуға арналған футбол турнирі өтті.
Шымкент магистральдық желі бөлімшесіне қарасты Арыс жол дистанциясының ұйымдастыруымен өткен турнирге 11 команда қатысты. Бір кездері қатардағы жолшы болып еңбек жолын бастаған Арыс жол дистанциясында Мәткерім Оңалұлы 37 жыл еңбек етіпті. Теміржолшылар әулетінің өкілі таңдаған кәсібінің барлық сатысынан өтіп, бригадир, айналым шебері, аға шебер, жол жөндеу бөлімінің бастығы дәрежесіне дейін өсіп, байырғы жолшылар мекемесіне бір кісідей еңбегі сіңді. Құрметті теміржолшы атанды. 2020 жылы 25 қазанда дүниеден озды.
Бүгінде теміржолшы династиясын жалғастырған ұлы Мұхит Тұрысбеков Арыс жол дистанциясы 2-айналымының жол бригадирі болып тер төгуде.
Тартысқа толы футбол турнирінің қорытынды есебі бойынша жеңіске жеткен командалар марапатталды. 1-орын алған команда 50 000 теңге, 2-орын – 30 000 теңге, 3-орын 20 000 теңге иемденді. Барлық команда кубок медалімен марапатталды. «Үздік шабуылшы», «Үздік қақпашы» номинаттарға да қаржылай сыйлықтар және ПЧ-54 Арыс жол дистанциясы басшысы Махмуд Рысбековтің атынан дипломдар табысталды.
Шара соңында теміржолшының ұлы Мұхит Тұрысбеков пен жары Айжарқын Арыстанқызы марқұмның рухына құран бағыштап, ас берді.