Арыста теміржолшылар арасында спорттық сайыс өтті
Түркістан облысы бойынша меншікті тілші
Арыс қаласындағы орталық стадионда теміржолшылар арасында волейбол мен арқан тартыстан командалық сайыс өтіп, үздік командалар белгілі болды.
«Қазкөліккәсіп» Шымкент магистральдық желісінің кәсіподақ ұйымы ұйымдастырған спорттық спартакиадаға Арыс станциясы мен Арыс қалпына келтіру пойызы, Локомотив пайдалану депосы мен Вагон пайдалану депосы, Әскерилендірілген теміржол күзеті мен Арыс белгі беру және байланыс дистанциясының құрама командалары қатысып, өзара күш сынасты.
Бұқаралық спортты дамыту мен оны кеңінен насихаттауды мақсат еткен салтанатты шараның ашылуында сөз алған кәсіподақ филиалының төрағасы Нағима Салықбаева мұндай басқосуларды өткізіп тұру теміржолшылар арасында дәстүрге айналғанын атап өтіп, қатысушыларға сәттілік тіледі.
Ал саламатты өмір салтын ұстанып, спортты серік еткен 70-ке жуық теміржолшы спорттың екі түрі бойынша тартысты сайыс өткізді. Волейболшылар арасында өткен кездесуде командалар арасында 16 ойын өтіп, қорытынды есеп бойынша Арыс станциясы ІІІ орын алды. Ал Арыс локомотив пайдалану депосы (ТЧЭ-32) – ІІ орынға иелік етсе, Арыс белгі беру және байланыс дистанциясының командасы І орынға лайық деп танылды.