Атыраулық теміржолшылар арасында шахматтан жарыс өтті

Атырау аймағында теміржол мекемелерінде еңбек ететін ерлер мен әйелдер арасында шахматтан іріктеу жарысы өтті.  

Іс-шараны Қазақстан темір жолының 120 жылдығы аясында «Қазкөліккәсіп» ҚБ Орталық кеңесінің Атырау өңірі бойынша өкілдігі мен Атырау қосалқы бөлімі кәсіподақ ұйымы және спорт нұсқаушылары ұйымдастырды.  

Бөлімше спорт нұсқаушысы Ринат Иманғазиев жеребе үлестіріп болған соң, ойыншылар жұбын анықтап, әркімнің қарсыластарын атады. Шахмат – ақсүйектер ойыны деп бекер айтылмаған. Әр қадамыңды «жеті өлшеп, бір кесіп» дегендей, әбден ойланып жүру керек. Сондықтан уақыттан қысым болған жоқ. Арасында шай ішіп, сергіп алуға да кәсіподақ қыздары мүмкіндік жасады. Дастархан жайылып, ас-су әзір болды. Ойыншылардың қай-қайсысы да намысты қолдан бермеуге тырысты. Мүлт кеткенде әттеген-ай деп те жатты. Бірақ қалай болғанда да жеңіс ұтқандікі. Ақырында әйелдер арасында 1-ші орынды вагоншы Гүлсая Нұрмағамбетова, 2-ші орынды байланысшы Ақтолқын Мухлесова иеленді. Ерлер арасында 1-ші орынды мақаттық машинист Ақтан Қабиев, 2-ші орынды ревизор аппаратынан Ерлан Жүнісов, ал 3-ші орынды машинист Бақтыбек Борамбаев иеленді. Жеңімпаздарға диплом мен бағалы сыйлық табыс етілді. Жарысқа қатысып жүлделі орынға ие болған жеңімпаздар «ҚТЖ» ҰК» АҚ бойынша өтетін шахмат чемпионатында аймақ намысын қорғайтын болады.