Спартакиада мәреге жетті

Спорттық-бұқаралық іс-шаралардың күнтізбелік жоспарына сәйкес Жамбыл кәсіподағы спорт нұсқаушыларының ұйымдастыруымен өткен спартакиадада жеті спорт түрінен жеңімпаздар анықталды.

Қазақстан теміржолының 120 жылдығына арналған жарыста гир көтеру және арқан тарту бойынша тораптық жарыстар Шу қаласында өтті.  

Гир көтеруден әуесқой спортшылар арасында ЭЧ-22 – Шу электрмен жабдықтау дистанциясының электрмонтерлері екі бірдей жүлдені еншіледі. Ермекбай Нұрлан 1-орынды жеңіп алса, Бейсенқұл Жаңабай үздік үштікті түйіндеді. Ал ПЧМ слесарі Арыстанқұл Аян 2-орынды иеленді. Арқан тартудан ШЧ-35 қызметкерлері жеңіс тұғырынан көрінді. 2-орын – ПЧМ командасына, 3-орын ЭЧ-22 мекемесіне бұйырды.  

Спартакиадада тартысқа толы болған спорттық жарыстың бірі – шағын футболдан өткен кездесулер. Тараз станциясында ұйымдастырылған матчта ТЧЭ-31 командасы жеңіске жетті. ЭЧ-21 еншісіне тигені – екінші орын, «ДС Бурыл» командасы 3-орынды қанағат тұтты.  

Бірнеше күнге созылған жарыс Тараз станциясында әйелдер арасындағы дартс пен дойбыдан, ерлер арасында шахмат және үстел теннисінен өткен бәсекеде түйінделді. Дартс және дойбы жарыстарында үш жүлде де ШЧ36 – Жамбыл сигнализация және байланыс дистанциясының құрамасына бұйырғанын айту керек. Мергендігімен танылған Ақбота Ембергенова топ бастаса, Айша Байболова мен Оксана Жексенбаева жүлдегер атанды. Дойбыдан Айша Байболова, Зарина Анарбекова және Алтын Тәшенованың мерейі үстем болды.  

Спорт нұсқаушысы Евгений Тян шахматтан ардагер теміржолшыларға тең келетін ойыншы жоқ екенін айтады. Бұл жолы да шаршы тақта алдындағы бәсекеде зейнеткер Виктор Устинов 1-орынды иеленген. Ал ЭЧ-21 өндірістік оқыту шебері Марат Құлбаев 2-орынды еншілеген. ЭЧ-23 энергодиспетчері Тұрарбек Жарас 3-орынды місе тұтқан.  

Үстел теннисінен ПЧ-52 жол дистанциясының қозғалыс бойынша кезекшісі Сәрсебек Қуаныш қарсылас шақ келтірмеді. Жамбыл магистральдық желі бөлімшесінің инженері Райымбек Мәмбетовке 2-орынның жүлдесі тапсырылды. ШЧ-36 Жамбыл сигнализация және байланыс дистанциясының учаске бастығы Асқар Ұлақұлов үштікті түйіндеді. Жеті бірдей жарыста жүлдегер атанған теміржолшылар грамоталармен, кубоктармен, медальдармен және бағалы сыйлықтармен марапатталды.