Бейнеу станциясында ұлттық спорт ойындарынан жарыс өтті
Маңғыстау облысы бойынша меншікті тілші
Жуырда Бейнеу станциясында сала кәсіподағының демеушілігімен ұлттық спорт ойындарынан жарыс өтті. Спорт нұсқаушыларының бастамасымен өткен сайысқа станциядағы барлық мекемелерден ойыншылар қатысты.
Ең алдымен ләңгі теуіп жарысқан жігіттер қатарында бұл ойынға машықтанғаны соншалық, икеміне салып алып, жерге түсірмей он-он бес минут өнер көрсеткендер болды. Қорғасыннан құйылған құрттай ләңгіні допша теуіп, демалмай ойнағандар амалсыз таңдай қақтырды. Жарыс қорытындысы бойынша үздіктер анықталып, диплом және басқа да сыйлықтарға ие болды. Бірінші орынды техникалық қызмет көрсету пунктінен Бейбіт Өмірғалиев, екінші орынды жол дистанциясынан Иса Құрманбаев, үшінші орынды вагон қараушы Тұрар Ниязов алды.
Бейнеу станциясындағы спорт нұсқаушысы Бекзат Нұрәлиев алдағы уақытта басқа да спорт түрлерінен сайыс өтетінін жеткізді.
