Локомотившілер топ жарды
Атырау облысы бойынша меншікті тілші
«Қазкөліккәсіп» ҚБ Орталық кеңесі Атырау өңірі бойынша өкілдігі мен спорт нұсқаушыларының бірлесе ұйымдастыруымен баскетболдан «ҚАЗПРОФТРАНС-2025» іріктеу турнирі өтті.
Атырау қаласындағы «Жусан» баскетбол аренасында өткен турнирге ТЧЭ-3, ТД-26, ВЧДЭ-1, ЭЧ-4, ШЧ-8, ШЧ-11 командалары қатысып, өзара сайысқа түсті. Жалпы, баскетбол – теміржолшылар арасында кең таралған күрделі ойын. Қарсыластың кедергісіне төтеп беріп, допты қақпайлап алып жүріп, қашықтан, жақыннан нысанаға атып, корзинаға дөп түсіру үлкен дайындық пен шеберлікті қажет етеді.
Бұл жолы да басында сәл босаңдау болған ойыншылар сәлден соң әбден төселіп алып, бір-бірінің қақпасына қарай шабуыл қарқынын үдете түсті. Доп бірде дөп түсіп, бірде қапы кетуімен қызықты болып, ойын шиеленісті де тартысты өтті. Нәтижесінде 3-орынды ШЧ-11, 2-орынды ВЧДЭ-1, ал жүлделі бірінші орынды ТЧЭ-3 командалары иеленді.
«Жеңіске жеткен локомотившілер командасы ендігі жерде «ҚТЖ» ҰК» АҚ бойынша баскетболдан өтетін жарысқа қатысып, өңірдің намысын қорғайтын болады», – дейді спорт нұсқаушысы Ринат Иманғазиев.
