Күзет сарбаздары арасында спартакиада өтті

Қандыағаш станциясында «Әскерилендірілген теміржол күзеті» ЖШС Ақтөбе филиалының ұйымдастыруымен спартакиада өтті. Жүзге жуық күзет қызметінің сарбаздары футбол және ұлттық ойын түрлерінен өзара жарысты.

Кәсіподақ комитеті демеушілік жасаған спартакиада Қандыағаш станциясында өтті. Атқыштар командасы гір көтеру, қол күресі, арқан тарту және футбол ойындарынан жекелеген және командалық жарыстарға қатысты.

Спартакиада Қандыағаш атқыштар командасын ұзақ жыл басқарған Әбдімұрат Сартабановтың зейнет жасына келуіне орай ұйымдастырылды. 

«Ғасырдан аса тарихы бар компанияның дамуына жеке үлесін қосып, қырағылық пен жауапкершіліктің үлгісі болған әріптестеріміз аз емес. Бүгінгі шара осындай бір әріптесімізді зейнетке шығарып салу ғана емес, ұжымдық рухты, бірлікті көтеру болмақ», – деді «ӘТЖК» ЖШС Ақтөбе филиалының бастығы Сарыбай Сәрсенов.  

Жүзге жуық қызметкер он командаға бөлінді. Олар әр станциядағы атқыштар командасы жеке команда құрып, жүзге жуық адам қатысқан айтулы додада шың мықтыны анықтау оңайға түспеді.  

«Бұл шараны мекеме басшыларының қолдауымен ұйымдастырдық. Қандыағаш атқыштар командасын басқарған Әбдімұрат Қалдыбайұлы қырық жылдан аса теміржол саласында еңбек етіп жүр. Өмір жолы жастарға үлгі», – деді Ақтөбе филиалының кәсіподақ төрағасы Әділхан Мұсаұлы.  

Әбдімұрат Сартабанов Қандыағаш атқыштар командасының бастығы қызметін 20 жылдан аса атқарған. Мәскеуде әскерилендірілген теміржол күзеті қызметі мамандығы бойынша жоғары білім алған  еліміздегі санаулы адамның бірі.  

Ол теміржолшылар қалашығы атанған Шалқар ауданының тумасы. 1980-82 жылдары әскери борышын өтеп, теміржол саласына жұмысқа кіреді. Алғашқы еңбек жолы жол монтері болудан басталып, кейін электр механигі болады. Әскерилендірген теміржол күзеті қызметінде 1984 жылдан бастап еңбек етеді.  

«Өмірімнің бәрі темір жол бойында өтті. Жасөспірім шақта да жарты жалақы алып, жазғы демалыста 6 сағаттық жұмыс істейтінбіз. Алғашқы табысымды 14-15 жасымда алдым. Өмір бойғы еңбек нанын осы жерден таптым. Темір жол мені көп нәрсеге үйретті, тәрбиеледі», – деді Әбдімұрат Сартабанов.  

Теміржолшылар отбасында дүниеге келген кейіпкеріміздің әкесі мен анасы өмір бойы жолшы болыпты. 15 ағайынды, бауырларының бәрі теміржолшы. Үйдегі де, түздегі де  әңгімелері шойын жолдың айналасы.  

Күзет сарбаздары арасындағы спартакиада жоғары деңгейде өтіп, әр спорт түрінен үздіктер, жекелеген ойыншылар анықталып, бағалы сыйлықтар және алғыс хатпен марапатталды. Жалпы командалық есепте Ақтөбе атқыштар командасы үшінші орын, Шалқар атқыштар командасы екінші орын иемденіп, жүлделі бірінші орын Қандыағаш командасында қалды.