Көкшетаудағы чемпионаттан жамбылдықтар жүлдемен оралды
"Қазақстан теміржолшысы" газетінің Жамбыл облысындағы меншікті тілшісі
Жамбыл жүк тасымалы бөлімшесінің құрама командасы теміржолшылар арасында волейболдан өткен чемпионатта жақсы ойын өрнегін көрсетіп, күміс жүлдегер атанды.
Оларды бөлімше директоры Айдын Сеитбенбетов қабылдап, алғыс білдірді. «Қазақстан темір жолы» ҰК» АҚ-ның екі жылда бір рет волейболдан дәстүрлі түрде ұйымдастырылып тұратын чемпионаты биыл Көкшетау қаласында өтті.
– Біздің командамыз финалға дейін жетіп, 17 команданың ішінде күміс жүлдегер атанып отыр. Бұл – үлкен жетістік. Теміржолшылар өз ісінің маманы ғана емес, олар сонымен бірге спортшылар. Салауатты өмір салтын ұстанып, жұмыстан тыс уақытта жаттығу жасап, спортпен шұғылданып жүрген спорт саңлақтарына алғыс айтамын, – деді Айдын Пайзылдаұлы.
Бөлімше кәсіподақ ұйымы төрағасы Серік Наурызбаев кәсіподақ теміржолшыларға әрқашан қолдау көрсететінін және бұл үрдіс әрі қарай жалғаса беретінін жеткізді. Чемпионатта Жамбыл бөлімшесінің командасы финалға шығып, 2-орынды олжалады. Ақтық ойында атыраулықтарға жол берді.