Кәсіби мерекеге орай турнир өтті
"Қазақстан теміржолшысы" газетінің Жамбыл облысындағы меншікті тілшісі
Кәсіби мереке және теміржолшылар кәсіподағының 120 жылдығына орай Шу және Тараз станцияларында төрт спорт түрінен турнир өтті.
Шу станциясында өткен тораптық жарыста теміржолшылар үстел теннисінен сынға түсіп, арқан тартудан кім мықтыны анықтады. Білек күшімен қатар, тактика да сыналатын командалық бәсекеде ШЧ-5 Шу белгі беру және байланыс дистанциясы жеңіске жетті. Шу станциясының құрамасы 2-орынды еншілесе, ЭЧ-22 тобы үздік үштікті түйіндеді.
Ал үстел теннисінен ЭЧ-22 Шу электрмен жабдықтау дистанциясының электромонтері Есбол Нәжетханов 1-орынды олжалады. Айналымдық жүйеде қарсыластарына ұпай алдырмай финалға дейін жеткен ШЧ-35 дистанциясының маманы Еркін Нарбаев 2-орынды қанағат тұтты. 3-орынды еншілеген Әділ Ақышев ЭЧ-22 дистанциясы командасының қоржынына тағы бір ұпай салды.
Тараз станциясындағы шахмат пен армрестлингтен өткен турнир де тартысқа толы болды. Кәсіподақ ұйымы Жамбыл филиалының спорт нұсқаушылары жылдан-жылға шахматшылар арасындағы бәсеке артып келе жатқанын айтады. Шахматтан «ЖРС» ЖШС-нің қызметкері Досбол Түймебек қарсылас шақ келтірмей, жеңіс тұғырына көтерілді. 2-орынды ЭЧ-23 Сарышаған электрмен жабдықтау дистанциясының ойыншысы Жарас Тұрарбек еншілесе, ЭЧ-21 Жамбыл электрмен жабдықтау дистанциясының маманы Марат Құлбаев 3-орыннан көрінді. Ал армрестлингте жүлделі орындарды Дәулет Жұмабек («ЖРС» ЖШС), Асхат Жұқанов (Тараз көліктегі оқу орталығы) және Хайдар Ахмет («ЖРС» ЖШС) иеленді.
Жеңімпаздар мен жүлдегерлерге кәсіподақ ұйымының атынан кубок, грамота, медальдар мен бағалы сыйлықтар табысталды.