Іріктеу турнирі өтті
Маңғыстау облысы бойынша меншікті тілші
Маңғыстауда теміржолшылар арасында шағын футболдан іріктеу турнирі өтті. Спорттық сайыс теміржолшылар кәсіподағының 120 жылдығына орай батыс өңірлеріндегі локомотив қызметкерлері арасында ұйымдастырылды.
Атырау, Ақтөбе және Маңғыстау локомотив деполарының командалары қатысқан жарысқа белгілі себептермен оралдық команда келе алмады. Іріктеу ойынында Атырау, Маңғыстау және Ақтөбеден Жем локомотив деполарының жігіттері бақ сынасты.
Үш топтың ойыншылары да есесін жібермеуге тырысып бақты, дегенмен түбектік теміржолшылар қонақжайлылық танытып бірінші және екінші орындарды алыстан ат терлетіп келген әріптестеріне берді. Нәтижесінде бірінші орын атыраулықтарға, екінші орын ақтөбеліктерге бұйырды.
Жеңімпаздар кубок, диплом, алғыс хат, үздік ойын көрсеткендер түрлі номинациямен және сыйлықтармен марапатталды. Ең бастысы Астана қаласында қазан айында өтетін қорытынды жарысқа жолдама алды.