Үздік үштік анықталды
Абай облысы бойынша меншікті тілші
Жуырда Семей жүк тасымалы бөлімшесінде футбол біріншілігіне кезекті іріктеу ойындары өтті. Кәсіподақ қызметінің 120 жылдығы мен алдағы келе жатқан Тәуелсіздік мерекесіне орай ұйымдастырылған сайысқа желі бойындағы әр мекемеден әуесқой футболшылар қатысып, өзара шеберлік сынасты.
Салалық кәсіподақ ұйымы ұйытқы болған бәсеке әр мекемеден келген қызуқанды жанкүйерлердің қиқу қосуымен мейлінше тартысты әрі қызықты өтті. Айта кетерлігі, осыған дейінгі футбол додаларында да сан мәрте қарымта байқасып жүрген, бір-бірінің әдіс-айласына әбден қанық теміржолшылар жоғары деңгейдегі даярлықпен келгендіктерін көрсетті.
Байқауға жалпы саны 9 команда қатысқан болатын. Барлығы да жасыл алаң төрінде өрнекті ойын көрсете білді. Десек те, финалға тек ұпай саны басым кіл мықтылар ғана жолдама алды.
Осылайша, финалдық сайыста еш шаршамастан дүркін-дүркін шабуыл жасап, қарсыластарының қақпасын дәл көздей білген ӘТЖК Семей филиалының футболшылары бірінші орынды жеңіп алды. Ал Семей вагон пайдалану депосының ойыншылары екінші орынды еншілесе, жүлделі үшінші орынды Семей жол дистанциясының командасы иеленді.
– Бұл үш команда да соңғы уақыттары үздік атанып жүрген әр біріншіліктің чемпиондары. Бабы басым болғандықтан да жүлделі орындарды өзара бөлісті. Ең маңыздысы теміржолшылар қауымына тамаша демалыс сыйлаған ерекше ойын болды, – дейді «Локомотив» спорт клубының нұсқаушысы Наталья Мешкова.
Сайыс соңында барша жеңімпаз командалар салалық кәсіподақ ұйымы тарапынан әзірленген бағалы сыйлықтармен салтанатты түрде марапатталып, үздік ойыншыларға арнайы дипломдар мен мақтау грамоталары табыс етілді.