Жыл садақшысы – Жаңаөзенде
Маңғыстау облысы бойынша меншікті тілші
Жаңаөзен станциясында еңбек ететін Самал Зулпыхаровты Маңғыстау облысының Дәстүрлі садақ ату федерациясы «Үздік садақшы-2025» номинациясымен марапаттады.
Самалдың жыл бойғы жеткен жетістігінің қатары тағы бір марапатқа толықты. Дәстүрлі садақ ату спортына келгеніне көп болмаса да, атқан жебесі нысанаға дөп тиетін оның соңғы жылдардағы жетістігі мол. Атап айтсақ, 2023 жылы халықаралық жарыстың бірінші орынын, былтыр Азия чемпионатынан үшінші орынды еншілеген еді. Ел ішіндегі сайыстардан алған жүлделері бір бөлек. Биыл да қоржыны талай жеңіске толды.
«Самұрық Қазына» АҚ компаниялары қызметкерлері арасында өткен садақ атуда бірінші, Қазақстан чемпионатында Орта Азия нысанасы бойынша бірінші, облыстық дене шынықтыру және спорт басқармасы ұйымдастырған чемпионатта екінші, Сайөтес ауылының мерейтойына арналған сайыста бірінші, Жаңаөзен қаласының мешіттері ұйымдастырған жарыста бірінші орынды алды.
Самал Зулпыхаров қашанда өзін жетілдіріп, спортты, салауатты өмір салтын бек ұстануының нәтижесінде барған байқауларынан бос қайтпай жүрген теміржолшы. Жебесі мен садағын асынып, қай жарысқа қатыспасын, алғашқы үштіктен түспей жүр. Көбіне бас жүлде еншісінде. Қазір ол Жаңаөзен станциясында станция кезекшісі. Түбек теміржолында он бір жылдан бері қызмет етіп келеді. Үздік садақшы енді «Спорт шебері» атағын да алып жатыр.