Қыс қызығы – «Кәсіподақ шаңғысы»
Абай облысы бойынша меншікті тілші
Шығыстағы Семей ЖТ бөлімшесі теміржолшылар үшін қысқы мезгілдегі спорт маусымы қызып тұр. Жуырда барша теміржолшылар қауымы бөлімшенің салалық кәсіподақ ұйымының ұйытқы болуымен «Кәсіподақ шаңғысы» атты қызықты сайыс додасын өткізді.
Жалпы, «Локомотив» мұзайдынындағы коньки тебу, төбешіктен тюбингпен сырғанаудан бөлек шаңғы жолына шығу кеңінен жолға қойылған. Бұл жолы да қарағайлы орман ішіндегі шаңғы базасы аумағында керемет шаңғы сайысы өтті. Мақсат – шаңғы спортын насихаттау, салауатты өмір салтын қолдау, теміржолшыларды салалық кәсіподақтардың жұмысына тарту болатын.
Бұл күні спорттық шараға желі бойындағы теміржолшылар ғана емес, сала ардагерлері де арнайы қатысты. Жиналғандар алдында бөлімше басшысының орынбасары Ерғазы Жұмаділов, «Қазкөліккәсіп» ҚБ Семей өңірі бойынша өкілі Есен Қажығұлов сөз алып, лебіз білдірді. Сонымен қатар шара қонағы Абай облысы Кәсіподақтар орталығының төрағасы Қуаныш Сүлейменов жарыстың өтуін қолдап, барлық қатысушыларға жеңіл старт және адал бәсекелестік тіледі.
Сөз жоқ, қысқы шаңғы жарыстары – бұл тек спорт қана емес, сонымен қатар дене мен рух күшін арттыратын және табиғатпен үйлесімділікті сезіндіретін айрықша спорттық мереке. Сондықтан да болар, сайыс мейлінше қызықты өрбіді. Десек те, орман ішіндегі шаңғы жолына шыққандар арасында локомотившілер үздік шықты. Атап айтсақ, Маржан Абдикаримова, Әсет Аманғазинов, Кенжеәділ Алтынбеков және Алмас Манасбаев сынды қатысушылар жоғары көрсеткіштер көрсетті. Ал кәсіпқой спортшы, НЖС-6 техникалық бөлімінің бастығы Нұрлан Бегәділов көш басынан табылды.
Барлық жеңімпаздар кәсіподақ ұйымы тарапынан әзірленген ақшалай сыйлық пен мақтау қағаздарын иеленді.