Семей теміржолшылары коньки сайысын жаңғыртты

Семейлік теміржолшылар қысқы спорт түрлерін дамытып қана қоймай, кейбір ойындарды қайта жаңғыртып жатыр. Жуырда «Локомотив» мұзайдынында бөлімше басшылығы бастамасымен коньки жарысынан ерекше сайыс өтті.  

Бүгінде Италия жерінде өтіп жатқан қысқы олимпиадалық ойындар, ел спортшыларының жетістіктері шығыстағы спортсүйер теміржолшыларды да қанаттандырды десек болады. Шараға жастар ғана емес, аға буын өкілдері, тіпті сала ардагерлері де жиналды. Жалпы саны 20-дан аса теміржолшы бақ сынаған, тұңғыш ұйымдастырылып отырған сайысқа филиал басшысы Алмас Сейсемқанов арнайы келіп ізгі тілегін білдірді.

Айта кетсек, семейліктер шаңғы жарысынан шебер, ұлттық компания бойынша алдына қара салдырмайды. Ал коньки сайысы араға ширек ғасырдан аса уақыт салып қайта оралып отыр. Ардагерлер қауымы бөлімше бойынша мұндай жарыстың соңғы рет қашан өткізілгенін естеріне түсіре алмады.

Қызу бәсеке жанкүйерлердің қиқу салуымен қызу басталды. Жүз метрлік қашықтыққа екі-екіден шықты, жастар мен ардагерлер өзара шеберлік сынасты. Қызық болғанда жастарға қарағанда 60 жастан асқан ардагерлер конькидің «құлағында» ойнайтын болып шықты. Жалпы, зейнет жасындағы байырғы сала қызметкерлері барлық спорттық шаралар бойынша жоғары белсенділік танытып жүргені белгілі. Нәтижесінде Владимир Радченко, Искак Узбаев, Жұмағали Жакупжанов жеңіс тұғырынан табылды. Сол тәрізді 40 жастан жоғарыдағылар арасында Еркін Қабышев, Руслан Әбікенов, Аманжол Аусыдықов, Мақсұт Түсіпбеков үздік шықты. Ал жастар арасынан Еркін Урунтаев, Дарын Рымғалиев, Ернат Сүлейменов қатарының алды атанды.

Сайыс соңында барлық жеңімпаздарды Семей филиалының директоры Алмас Ғылымұлы құттықтап, ақшалай сыйлық пен алғыс хат табыстады.

Бөлімшенің спорт нұсқаушысы Наталья Мешкованың айтуынша, басшылық пен теміржолшылар тарапынан алдағы уақытта хоккей ойындарын өткізу бойынша ұсыныс түсуде.