Үстел теннисі теміржолшыларға таңсық емес

Үстел теннисі аймақ теміржолшыларының арасында тым жиі, кәсіби деңгейде ойналатын футбол, волейбол, допты таяқ секілді болмаса да жиі өткізілетін спорттық жарыстың бірі. Оған жыл сайын қызығушылар саны артып келеді.  

Биылғы жоспарлы шаралар тізіміндегі жарыс ретінде белгіленген спорт сайысы облыстық теннис орталығында ұйымдастырылып, оған Қызылорда (Қазалы станциясынан бір ойыншы қатысып жеңісті иеленіп кетті) станциясындағы салалық мекемелерден «ЭЧ-25», «ТЧЭ-34», «НОРПОЖ», «НОД-10», «ДС Белкөл», «ДС Кызылорда» секілді құрама командалардан барлығы 13 спортшы қатысып, оның ішінде 9 ер адам және 4 қыз бақ сынады.

Қыздардың спортқа ден қойып, қызығушылық танытып қоймай әжептеуір бейнелі ойын өрнегін көрсетуі, аталған спорт түрінің ептеп-ептеп теміржолшылардың хобиына айналып келе жатқанын білдірсе керек. Бөлімшенің спорт секторы Бақытжан Имбергеновтың айтуынша теннис жарысы қызықты да тартысты өтті. Жарыс қатысушылары өздерінің шеберлігін сынға салып өзара жеңімпазды анықтады.

Б. Имбергеновтың айтуынша, әрбір ойыншы шарды қабылдау, шабуылдау және қорғаныс тактикасын тиімді пайдаланып, өз мүмкіндігін барынша көрсетуге тырысып бақты.

Нәтижесінде қатысушылар өзара мықтыны анықтап, жеңімпаздар мен жүлдегерлер анықталды. Бөлімше басшылығы мен кәсіподақ ұйымдары келісімімен теміржолшылар үшін спорт секторы тарапынан ұйымдастырлатын жарыстар теміржолшылар арасында салауатты өмір салтын қалыптастырып қана қоймай, ұжымдық бірліктің беки түсуіне зор үлес қосылатыны байқалады.

-Үстел теннисі аймақ теміржолшыларына таңсық емес. Көп жылдан бері спорттың осы түрінен ойын өткізіліп, теміржолшылардың қызығушылығы күн сайын артып келеді. «Қазтеміржолкәсіп» ҚБ Қызылорда филиалының басшылығы мен мекеме кәсіподақ ұйымдары ұйымдастырған үстел теннисінен өткен жарыста 3-орынды Қызылорда электрмен жабдықтау дистанциясының электромеханигі Бақыт Иманалиев иеленді. Екінші орынды Қызылорда ЖТ бөлімшесінің инженері Талғат Сыздықов олжаласа, жүлделі 1-орынды Қазалы жол дистанциясының жолшысы Қайрат Денеев қанжығасына байлады, – дейді спорт секторы Бақытжан Имбергенов.