Семейлік теміржолшылар республикалық марафонда үш «алтын» иеленді
Абай облысы бойынша меншікті тілші
Жуырда, 3 мамыр күні Астана қаласындағы ботаникалық бақта «Самұрық-Қазына» қорының ұйымдастыруымен өткен дәстүрлі «IV CHARITY SAMRUK MARATHON» сайысына Семей теміржолынан сегіз адам қатысты
Еліміздің әр өңірінен келген жалпы саны 3000-нан астам адам қатысқан жарысқа аймақтардан «сен тұр, мен атайын» дейтін кілең мықтылар іріктелгені даусыз. Дәстүрлі сайыс жыл сайын өткізілетіндіктен барлық теміржолшылар жоғары деңгейдегі даярлықтан өткен және тәжірибе жинап үлгерген әуесқой спортшылар. Абай елінен сайланып шыққан жігіттер үшін теміржолшылар намысын қорғау оңайға түспепті. Әйтсе де, осынау байрақты бәсекеде үш теміржолшының бағы жанып, үшеуі де алдарына қара салдырмай бірінші орынды еншілегені – сүйінші сұрап айтарлық қуанышты хабар.
Атап айтсақ, жарыста ұзақ даярлықтан өтіп, бабы келіскен Семей магистральдық желі бөлімшесінің техникалық бөлімінің бастығы Нұрлан Бегәділов өз жас санатында 5 км шақырымға жүгіруден бірінші орынды жеңіп алды. Ал Семей станциясының вагондардың қозғалыс жылдамдығын реттеуші Еркебұлан Ахмадиев пен Семей жол дистанциясынан қатысқан Руслан Бекешов 10 шақырымға жүгіруде өз жас санаттары бойынша жүлделі бірінші орынды жеңіп алды.
Жігіттер алдағы уақыттарда өтетін республикалық деңгейдегі өзге сайыстарда да Семей теміржолының намысын қорғайтын болады.
