Аманжол – Азия чемпионы
Абай облысы бойынша меншікті тілші
Жақында Маңғыстауда Азия құрлығының чемпионаты өтті. Осынау байрақты бәсекеге кір тасын көтеруден Семей электрмен жабдықтау дистанциясының электромеханигі Аманжол Аусыдықов арнайы қатысып, ұлттық компанияның намысын қорғады.
Осыған дейін де шаңғы көпсайысы, қол күресі сынды көптеген спорт түрлерінен республикалық жарыстардан бәйге алып жүрген ол осы жолы да жұлдызы жанып, бабы келісіп, жарты әлемнің спортшылары қатысқан біріншіліктің бас жүлдесін еншілеп, Азия чемпионы атанды.
Айтуынша, Өзбекстан, Тайланд, Қытай, Моңғолия, Ресей, т.б. елдерден келген құрыш білекті спортшылар сынға түскен әлемдік додада өнер көрсету оңай болмапты. Ауыр атлетиканы серік ететін, осыған дейін ПЧ-39 мекемесінде, жол шаруашылығында жүріп шыңдалған Аманжол бұл жеңіске зор дайындық, шүмектеп төккен тердің арқасында жеттім деп отыр.
– Осымен үшінші дүркін Азия чемпионы атану бұйырыпты. Бәрінен де бұрын ұлттық компанияның жалауын биік мінберден желбіреткенімді мақтан етемін. Алда бұдан да зор белестер тұр. Елге жеткен соң дайындықты қайта жалғастырамын, – дейді ол.
Аманжол сондай-ақ осынау жеңісті жолға жетелеген рухани бапкері – бөлімшедегі «Локомотив» спорт клубының нұсқаушысы Наталья Мешкова мен зор қолдау көрсеткен ЭЧ-18 мекемесіне, демеушілік жасаған салалық кәсіподақ ұйымына, барша жанкүйер болған теміржолшылар қауымына алғысын білдірді.