Жамбылдық волейболшылар «ЦЖС кубогында» күміс жүлдегер атанды
"Қазақстан теміржолшысы" газетінің Жамбыл облысындағы меншікті тілшісі
Астана қаласында өткен «ЦЖС кубогы» ойынында барлық өңірден келген командалар спорттың бес түрі бойынша сайысқа түскен болатын. Жамбыл магистральдық желі бөлімшесінің волейболшылар құрамасы екінші жүлделі орынға ие болды.
Алғашқы кездесулерден-ақ фавориттердің бірі екенін дәлелдеп, тартысты ойын өрнегін көрсетті. Әр айналымда қарсыластарын айқын басымдықпен жеңген жамбылдықтар финалда Қостанайдан келген әріптестеріне ғана жол беріп, күміс жүлдегер атанды.
– Жарыста әр өңірден келген құрылымдық бөлімшелердің құрамалары сынға түсіп, нағыз командалық ойын өрнегін көрсетті. Біздің командамыз волейболдан финалға дейін жетіп, екінші орынды еншіледі. Жалпы жамбылдықтар бұған дейін де ірі жарыстарда жүлде алып жүрген фаворит командалардың бірі саналады. Талап бойынша құрамадағы 8 ойыншының екеуі қыз-келіншектер болуы тиіс. Топтың капитаны, Тараз станциясының маневрлік диспетчері Мақсат Абатов жақсы құрам жасақтап, ойыншыларымыз олжалы оралды, – дейді бөлімше кәсіподағы ұйымының төрағасы Данияр Меңдыбаев.
Жарыс қорытындысы бойынша Хантау станциясының кезекшісі Мирас Доғдырбай «Үздік байланыстырушы» атанып, жамбылдықтар қоржынына тағы бір жүлде салғанын айта кету керек. Ал команданың жарысқа қатысуына «Қазтеміржолкәсіп» ҚБ Жамбыл филиалы қаржылай қолдау көрсетті.