«Қазтеміржолкәсіп-2026»: Қызылорда командасы финалда

Қызылорда қаласындағы KGEK спорт аренасында «Қазтеміржолкәсіп-2026» теміржол футбол лигасы кубогының аймақаралық командалар арасындағы жартылай фи налдық ойыны өтті.

Финал жолдамасын сарапқа салған тартысты ойында үш команда бірбірін жеңе алмай ұзақ арбасты. Соңында қарсыластарын ұпай санымен ұтып, айласын асыра білген Қызылорда локомотив пайдалану депосының «ТЧЭ-34» командасы жеңіске жетіп, финалдық жүлдеге ие болды.

Компанияның оңтүстіктегі Қызылорда, Шымкент және Тараз бөлімшелерінің теміржолшылары арасында ұйымдастырылған жартылай финалдық сайысты «Қазтеміржолкәсіп» ҚБ Қызылорда филиалы бастаған салалық мекемелердің бастауыш кәсіподақтар ұйымдары ұйымдастырып, командаларға барлық жағдай жасады.  

Алғашқы ойында Шу машиналандырылған жол дистанциясының «ПЧМ Шу» командасымен алаңға шыққан қызылордалық локомотившілер құрамасы алғашқы минуттан бастап ойын тізгінін қолдарына алуға барын салып бақты. Ал келесі кезекте Арыс локомотив пайдалану депосының «ТЧЭ-32» командасымен алаңға шыққан қызылордалықтар қарсыластарының осал тұсын аңдып біршама уақыт өткізгенмен сәті келгенде қонақтар қақпасынан қылау тапқан Баубектің тепкен добы есептің ашылуына себеп болып, команданы 3-2 есе айырмасымен алға шығарды.  

Арыстықтар мен жамбылдық командалардың кездесуі де тартысты өтті. Ойын басында тізгінді қолға алғысы келген Арыс құрамасы қарсылас қақпасына доп енгізгенмен, ойын ортасына қарай жамбылдық команданың мерейі үстем бола бастады. Арыстықтардың қақпасының осал тұсын тапқан жамбылдықтар бірінен соң бірін енгізіп, гол санын арттырып, 7-3 есебімен қарсыластарынан басым түсті.  

– Қызылордалық машинистер командасы өз алаңында үздік ойын өрнегін көрсетіп, финал жолдамасын жеңіп алды, енді финалдық ойынға қатысатын болады, – деді спорт секторы Бақытжан Имбергенов.  

Кәсіподақ ұйымы тарапынан жеңімпаз командаларға кубок пен бағалы сыйлықтар табыс етілді.