ҚТЖ өкілі «TEMIRADAM» кубогінің үшінші кезеңіне қатысты

«Қазтеміртранс» АҚ Техникалық саясат департаментінің директоры, «ҚТЖ 100 жас есім» жобасының жүлдегері Аян Кәрібжанов «TEMIRADAM» кубогінің үшінші кезеңіне қатысты. Бурабайда өткен триатлон жарысында теміржолшылар намысын қорғаған Аян бұл додаға былтырдан бері тыңғылықты дайындалған екен. Кубокқа PRO санатындағы 6 атлет, әуесқой 195 атлет, жалпы барлығы 15 эстафеталық команда қатысқан. Соның ішінде әуесқой атлет ретінде бақ сынаған Аян Кәрібжанов үш кезеңнен тұрған жарыс шарттарын 2 сағат 52 минутта орындап шыққан, яғни бірінші 1500 метр жүзу, екінші 40 км веложарыс және үшінші 10 км жүгіру жарысына қатысқан. – Мұндай жарысқа бірінші рет қатысып тұрмын. Өте жоғары деңгейде өтті. Мен үшін үлкен тәжірибе болды. Жалпы бұл спорт додасына былтырдан бастап дайындалдым. Былтыр мамыр айынан бастап жүгіруді бастасам, шілдеде шосселік велосипед алып, біздің «Railways Athletics club» клубындағы теміржолшы әріптестеріммен бірге дайындалдым. Маған қолдау білдіріп, алға ынталандырғаны үшін осы клубқа және жеке жаттықтырушым Александр Нечаевке алғысымды білдіремін. Ал қыркүйек айынан бастап екі ай арнайы жаттықтырушының көмегімен жүзумен айналыстым. Осылайша өткен жылдың қараша айынан бастап триатлонмен толыққанды айналысып, аталған спорттың үш түрін біріктірдім. Биыл маусымнан бастап дайындықты одан сайын күшейтіп, аптасына 9 рет жаттығуға дейін жеткіздім. Бұл жарыста жеңіске жетпесем де, «ҚТЖ» логотипі бар арнайы киіммен шығып, компания намысын қорғадым және бұл мені алдағы жеңістерге ынталандырды, – дейді Аян Кәрібжанов. Аян бұл кубоктің үшінші кезеңі биыл 15 тамызда елордада өтетін «Ironman 70.3 Astana» жарысына өте үлкен да- йындық болды деп санайды. «Жалпы мен алдағы уақытта да өмірімді осы триатлонмен байланыстыруды, осы сүйікті спорт түрін мәңгілік серік етуді мақсат еттім, бұл да адамның салауатты өмір сүру салты деп санаймын», – дейді ол. Бойдағы барлық ерік-жігерді ұштайтын, табанды және қажырлы еңбекті қажет ететін спорт түрін меңгерген Аян сияқты теміржолшы жастар замандастарына үлгі-өнеге дер едік.