Еуропада түнгі жеке купелі пойыздар іске қосылады
Берлинде орналасқан Nox стартапы 2027 жылдан бастап Испаниядан Польша мен Швецияға дейін түнгі пойыздар желісін іске қоспақ. Мақсаты – қысқа бағыттағы әуе рейстерімен бәсекеге түсу, деп хабарлайды Rail-news.kz.
Пойыз билеттерінің бағасы әуе рейстерімен шамалас болады. Жолаушыларға бір және екі орындық жеке купелер ұсынылады. Купелерде 2 метрлік жатын орындар, үстелі бар орындықтар мен багажға арналған кеңістік қарастырылған.
Nox түнгі пойыздарда бөгде адамдармен бірге жүргісі келмейтін жолаушыларға жеке кеңістік ұсынатын концепция әзірлеген.
Стартап қазіргі уақытта вагондардың интерьерін әзірлеп жатыр және 2025 жылғы тамызда инвестиция тартудың жаңа кезеңіне дайындалуда. Сондай-ақ, «Early Bird Club» атты қауымдастық құрып, оның мүшелеріне жеңілдіктер мен алдын ала брондау мүмкіндіктерін ұсынуда.
Компанияны Simply Railway атымен танымал видеоблогер Тибо Констант пен бұрын Flixtrain және Bolt компанияларында жұмыс істеген Янек Смолл негізін қалаған.
