Әлемдегі ең жүйрік CR450 пойызы 453 км/сағ жылдамдықты еңсерді
Жолаушылар тасымалына іске қосылмас бұрын пайдалану сынақтарынан өтіп жатқан қытайлық жаңа CR450 жоғары жылдамдықты пойызы арнайы әзірленген жаңа батареялармен жабдықталды, деп хабарлайды Rail-news.kz.
Мұндай рекордтық жылдамдыққа қол жеткізудің негізгі факторларының бірі — салмақты азайту болды. Пойызда Changhong компаниясы әзірлеген литий-ионды батареялардан тұратын апаттық қуат беру жүйесі қолданылады. Жоба бойынша жұмыстар 2018 жылы басталған, ал құрылымға қойылатын талаптар оннан астам рет қайта қаралған.
2023 жылдың соңына қарай аккумуляторлық жүйенің салмағын 2000 келіден 1200 келіге дейін азайту мүмкін болды, бірақ кейін тапсырыс беруші сипаттамаларын жоғалтпай, салмақты тағы 200 келіге жеңілдетуді талап еткен. Нәтижесінде көптеген толықтырулар, модельдеу және сынақтардан кейін инженерлер салмақты 920 келіге дейін қысқартты. Құрылымды кешенді оңтайландыру пойыздың биіктігін 20 см-ге төмендетуге және жалпы салмағын шамамен 50 тоннаға азайтуға мүмкіндік берді, бұл CR450-ге рекордтық жылдамдықты бағындыруға көмектесті.
Сынақтар кезінде ол осындай құрамдар арасында жылдамдық рекордын орнатты: жеке электропойыз 453 км/сағ жылдамдыққа дейін екпін алды. Бұл оны әлемдегі ең жүйрік жоғары жылдамдықты пойыз етеді.