Еуропа теміржолдарына бірыңғай билет жүйесі енгізілмек
Австрияның жеке теміржол операторы Westbahn Еуропада бірыңғай теміржол билетін енгізуді қолдады. Компания халықаралық пойыз билеттерін сатып алу процесін жеңілдетіп, барлық операторларды ортақ жүйеге қосуды ұсынды, деп хабарлайды Rail-news.kz.
Westbahn басшылығының айтуынша, қазір жолаушылар бірнеше ел мен әртүрлі теміржол компанияларының бағыттарын пайдалану үшін бөлек платформалар мен брондау жүйелеріне жүгінуге мәжбүр. Компания мұндай жүйе халықаралық сапарларды қиындатып отырғанын атап өтті.
Аталған компанияның бас директоры Томас Пош теміржол билеттерін сатып алу стриминг сервистерін қолданғандай оңай болуы керек деген ойда. Оның сөзінше, «бір іздеу, бір билет және барлық операторлар» қағидаты Еуропадағы теміржол тасымалын жаңа деңгейге көтереді.
Еурокомиссия дайындап жатқан жаңа теміржол пакеті барлық компаниялардың билеттерін ортақ платформаларда кемсітусіз сатуды қарастырады. Бұл жолаушыларға бағыттарды, бағаларды және жол жүру шарттарын салыстыруды жеңілдетпек.
Westbahn мұндай жүйе халықаралық теміржол қатынасына сұранысты арттырып, қызмет сапасын жақсартады деп есептейді. Компания 2011 жылдан бері Австрия теміржол нарығында жұмыс істейді және Вена, Зальцбург, Мюнхен, Штутгарт секілді бағыттарда қатынайды. 2026 жылдың наурызынан бастап оператор Австрияның оңтүстік бағыттарына да пойыз шығаруды жоспарлап отыр.