Өзбекстан мен Пәкістан Трансауған теміржолы жобасын жеделдетуді талқылады
Өзбекстан мен Пәкістан өкілдері Трансауған теміржолы құрылысы жобасын іске асыру барысын талқылады. Жиында техникалық-экономикалық негіздемені дайындауды жеделдету мен жобаның практикалық кезеңіне көшу мәселелеріне ерекше назар аударылды, деп хабарлайды Rail-news.kz.
Өзбекстан Сыртқы істер министрлігіне қарасты «Дунё» ақпараттық агенттігінің хабарлауынша, бұл мәселелер Исламабадта өткен кездесуде қаралды. Жобаны Өзбекстанның Пәкістандағы Елшісі Әлішер Тоқтаев пен Пәкістан Теміржол министрінің бірінші орынбасары Мазхар Әли Шах талқылады.
Теміржол жобасынан бөлек, тараптар бірлескен көлік-логистикалық бастамаларды дамыту және жүк тасымалының тиімділігін арттыру үшін цифрлық шешімдерді енгізу мәселелерін де сөз етті.
Пәкістан тарапы бұл теміржолдың аймақ елдері үшін стратегиялық маңызы зор екенін атап өтті. Өйткені бұл жоба жүк тасымалының көлемін арттыруға және Орталық әрі Оңтүстік Азия арасындағы көлік байланысын нығайтуға мүмкіндік береді.
Өз кезегінде Өзбекстан өкілдері далалық зерттеу жұмыстарын бастауға қажетті ұйымдастыру шараларының аяқталғанын мәлімдеді. Жобаны іске асыруды тездету мақсатында тараптар қатысушы елдердің бейінді мамандарымен онлайн-кездесу өткізуге уағдаласты.