Еуропалықтар соңғы он жылда алғаш рет автобусқа қарағанда пойызбен жиі қатынаған
Еуропалық Одақта соңғы он жылда алғаш рет теміржол көлігі жолаушылар тасымалындағы үлесі бойынша автобустарды басып озды. Еуростаттың соңғы деректеріне сәйкес, 2024 жылы пойыздардың үлесі 7,5%-ға жетсе, автобус пен троллейбустардың үлесі 7,3%-ды құрады, деп хабарлайды Rail-news.kz.
Дегенмен Еуропада негізгі көлік құралы әлі де автомобиль болып отыр. 2024 жылы ЕО-дағы барлық жолаушылар тасымалының 69,2%-ы автокөліктердің үлесіне тиесілі болды. Ал теңіз көлігінің үлесі небәрі 0,4% деңгейінде қалған.
Соңғы он жылдағы ең жоғары өсім әуе көлігінде тіркелген. 2014 жылдан бері авиацияның үлесі 3,6 пайыздық тармаққа артқан. Осы кезеңде теміржол көрсеткіші 0,9 пайыздық тармаққа өсті.
Керісінше, автомобиль көлігінің үлесі он жылда 2,9 пайыздық тармаққа, ал автобустардың үлесі 1,3 тармаққа төмендеген.
Осылайша, Еуропада автомобиль әлі де негізгі көлік құралы болғанымен, жолаушылардың теміржол және әуе көлігіне бет бұру үрдісі біртіндеп күшейіп келеді.