4 мың жұмысшы 6 мың шақырымнан астам жолды қардан тазартты
Ауа райының қолайсыздығына байланысты темір жолда жедел қызметтердің тәулік бойғы кезекшілігі жүргізіледі. Жолдың жай-күйі, байланыс желісі мен техникасы күшейтілген бақылауда, деп хабарлайды Rail-news.kz.
12 мен 13 ақпан аралығында темір жолдардан 17 мың текше метрден астам қар шығарылды.
Қармен күрес бойынша негізгі жұмыстар магистральдық желінің Ақтөбе, Қостанай және Ақмола бөлімшелерінің аумақтарында жүргізілді. Теміржол төсемін жедел тазалау үшін 90 бірлік қар жинайтын және қар тазалайтын техника шығарылды. 6086 км жол тазартылды. Тиісті инфрақұрылымды тазарту үшін қосымша 4 мыңнан астам теміржолшы тартылды. Тәулік бойы жедел қызметтердің кезекшілігі жүргізілді. Жол жағдайы, байланыс желісі мен техника күшейтілген бақылауда болды.
Қар мен боран жағдайында қабылданған шаралар теміржол көлігінің үздіксіз жұмысын қамтамасыз етті.