Дегелеңде бір айда 12 мың 565 вагонға көмір тиелген
Абай облысы бойынша меншікті тілші
Семей ЖТ бөлімшесі бойынша өткен қаңтар айында көмір тасымалының күрт артқаны байқалады. Бұл – назар аударуға тұрарлық дерек. Себебі, бұрынғы жылдардағы межемен салыстырғанда қатты отынды тиеу мен жеткізу бойынша жұмыстар қарқын алып, сәйкесінше көрсеткіш те артқан.
Мәселен, бір ғана қаңтар айындағы жоспар 106 пайызға артығымен орындалыпты. Небары бір ай ішінде Дегелеңнен тиелініп, шартарапқа жол тартқан көмір толы вагондар саны 12 565-ке жеткен.
Қазіргі күні «Жылукоммунэнерго» ЖШС мен «ВостокУгольПром» мекемесіне көмір жеткізу ісі жоспардың мерзімінде орындалуына септігін тигізуде.
Осы шаралардың нәтижесінде бөлімшедегі тораптық жүк станциялары Семей, Жаңа-Семей және Аягөз бен Шардағы техникалық жүк түсіру өткен ай бойынша 123 пайызға артыпты. Жоспардағы 132 вагонның орнына тәулігіне 163 вагон түсірілген. Бұл әрине өткен жылдың қаңтарындағы көрсеткіштен әлдеқайда артық.
Теміржолшылардың айтуынша, жыл басындағы жаңа жоспар бойынша Қаражырадан көмір тиеу кідіріссіз әрі жүйелі түрде жүргізілуде. Бұл ретте Шығыстағы тұрмыстық-коммуналдық сала толықтай қатты отынмен қамтылған. Тек көмір тұйықтарында қарбалас көп, яғни, жеке сектор тұрғындары тарапынан түсетін өтініштер әлі де бар.
Қазіргі таңда сонымен қатар, Семей мен Аягөздегі тұйық желілерде жеткілікті мөлшерде көмір қоры бар. Бұл орайда бөлімшенің басты әріптестері саналатын «Жігер» ЖШС мен «Семей көмір» ЖШС қатты отынның техникалық және сұрыпталған түрлерін саудалауда. Бағасы 9 500-ден басталады. Әрбір теміржол тұйығының тәулігіне 19-21 вагон көмір түсіруге мүмкіндігі бар.
Бүгінде Дегелең станциясынан көмір тиелген ең кемі төрт пойыз тұрақты түрде жолға шығарылуда. Жылжымалы құрамдардың барлығы да ауыр салмақты болғандықтан пойыз құрастыру ісі біршама күш салуды талап етеді. Салмағы 6 200 тонналық 63 вагоннан тұратын жылжымалы құрамдар қозғалысында кедергі жоқ. Барлық жүк станцияларындағы маневрлік жұмыстар жеделдетілген түрде жүзеге асырылады. Бұл орайда айналымдағы локомотив пен вагон тапшылығын болдырмау – бөлімше басшылығының назарындағы тұрған бірінші мәселе.