ҚТЖ басшысы теміржолшыларды ұлыстың ұлы күнімен құттықтады
Құрметті әріптестер!
Сіздерді ұлыстың ұлы күні – Наурыз мерекесімен құттықтаймын! Әз-Наурыз елімізге, әрбір шаңыраққа бірлік пен береке, ырыс- құт, бақыт пен қуаныш әкелсін!
Наурыз – қыстың көбесі сөгіліп, тіршілік атаулыға жан бітіп, жер-дүние жасарып, жаңаратын, көгеріп, көктейтін шақ. Табиғаттың осындай керемет кезеңі жұмыстарыңызға жаңа серпін берсін! Жол үстінде жүрген немесе орталықта және аймақтарда жолаушылар мен жүк тасымалының үздіксіз болуын қамтамасыз етіп отырған әріптестеріме тілейтінім – талмас талап, қажымас қайрат!
Түптеп келгенде, ұлттық санамызды жаңғыртып, жоғымызды түгендеп, барымызды бүтіндеу- де бұл мерекенің жолы да, жөні де бөлек. Өзіндік құндылығымыз дәріптелетін бұл мейрамда Отанымыздың игілігі, халқымыздың берекесі таси берсін! Әр шаңырақ бақыт пен шаттыққа кенелсін! Ұлыс оң болсын, ақ мол болсын!
Нұрлан САУРАНБАЕВ, «ҚТЖ» ҰК» АҚ Басқарма төрағасы