Семейде «Қауіпсіздік – кәсібилікте» семинары өтті

Семей ЖТ бөлімшесінде «Қауіпсіздік – кәсібилікте» ұраны аясында қызықты семинар өтті. Оның қызықтылығы – сайыс түрінде өтуі еді. Басты мақсат қозғалыс саласына жауапты теміржолшылардың кәсіби біліктілігін шыңдай отырып, еңбекті қорғау, өндірістік қауіпсіздік талаптарын күшейту арқылы теміржол мекемелерінде қауіпсіз орта қалыптастыру болды.

 Шараға желі бойындағы барлық мекемелерден жалпы саны 60-тан аса теміржолшы қатысты. Бөлімше басшысының бірінші орынбасары Ғабит Есқожанов сөз алып, бүгінгі таңда өзекті болып отырған қауіпсіздік пен еңбек қорғау тақырыбын қаузады. Кезек баяндамашыларға беріліп, Семей ЖТ бөлімшесі кәсіподақ ұйымының төрағасы Асхат Жармұхаметов «Техникалық инспекторлар қызметінің маңызы» тақырыбында, ал бөлімшенің қауіпсіздік және еңбекті қорғау бөлімінің жетекші инженері Бекзат Кәрімханов «Еңбекті қорғаудың позитивті мәдениетін қалыптастыру» тақырыбында баяндама жасады. 

Десек те, шараның мән-маңызы «Қауіпсіздік – кәсібилікте» атты тақырыптағы сайысқа кезек берілген кезде арта түсті. Өзара біліктілікті сынға салу бәсекесіне Семей, Жаңа-Семей, ВЧДЭ-23 және ТЧЭ-24 мекемелерінің үш адамнан тұратын командалары қатысты. Әрбір команданың өзгелерден ерекшелендіретін бірегей түстегі киімдері мен бейдждері, т.б. нысандары болды. Баға беруші қазылар алқасы мұны да ескерді. Сонымен қатар, сайыс барысында тез, шапшаң ұтқыр жауаптары мен ойлау логикалары, өздерін ұстау мәдениеті де 1-ден 10-ға дейінгі балдық жүйемен қорытындыланып отырды. Сайыстағы ең қызықты сәт викториналық сұрақтар болды. Оған қатысушылар да, жауап берушілер де көп болды. Сол тәрізді өндірістік қауіпсіздік пен экология тақырыбындағы сауалдарға жедел әрі нақты жауап беру көзделетін «Кім жылдам?» сұрақ-жауабы да теміржолшылардың қарым-қабілетін жан-жақты аша түсті. 

Теміржолшылар қызметі қашан да қарбалас, шұғыл шешім қабылдауды қажет ететін сәттер аз болмайды. Сайыстың үшінші кезеңі «Сауал қой!» деп аталып, теміржолшылар түрлі қатерлі жағдайда инструкция бойынша қалай әрекет ету керектігі жайында бір-біріне ситуациялық сұрақтар қойды. Мәселен, өндірістік жарақат алған адамға немесе жүрек талмасы ұстап, қан қысымы көтерілген жанға алғашқы медициналық көмек қалай көрсетілуі керек деген сауалға жауаптар да әралуан және көп болды. Тосыннан қойылған маңызды сұрақтардың әсіресе жас буынға үйретері көп еді. Мәселен, «электр приборларындағы өртті құммен сөндіруге бола ма?» деген сауал қызу талқыланды. 

Сондай-ақ, семинарда өндірістік қауіпсіздік пен экологиялық талаптарды сақтау бойынша маңызды мағлұмат беретін арнайы бейнефильмдер мен бейнероликтер көрсетілді.

 Осылайша сайыс та мәресіне таяған болатын. Соңғы мотивациялық кезеңде ойын барысында ерекше белсенділік танытқан теміржолшылар кәсіподақ ұйымы тарапынан марапатталды. Бұл орайда Семей және Шар, Жаңа-Семей, ВЧДЭ-23, Жарма теміржолшылары үздіктер қатарынан табылды. 

– Мұндай семинарлар мен сайыс түріндегі дәрістерді біз жиі өткізіп тұрамыз. «Қайталау – білім анасы» демекші, кәсібилікті арттырып, қырағылықты ұштайтын, біліктілікті шыңдайтын шаралар әсіресе жас буын үшін ауадай қажет. Ал аға буын өкілдерінің тәжірибелерінен үйренеріміз аз емес. Бүгінгі сайыс соған дәлел, – деді шараны ұйымдастырушылардың бірі, бөлімшенің қауіпсіздік және еңбекті қорғау бөлімінің жетекші инженері Бекзат Нұрланұлы.