Семейде телефон терроризімі өзекті

Соңғы уақытта ел шығысында «телефон терроризмі» тым үдеп кетті. Бір аптада жалған қоңырау шалу жағдайлары жиі тіркелген.

Тосын оқиғалар әсіресе Семей мен Өскемен қалаларында көптеп орын алуда. Бұл жайт көліктегі тәртіп сақшыларын да алаңдатып отыр. Жуырда желілік полиция қызметкерлері Семейдегі Абай атындағы әуежайда арнайы жиын өткізіп, аталмыш тақырып аясында әңгіме өрбітті.

Жиын барысында жалған қоңырау түскен сәттердегі жедел әрекет, соның ішінде теміржол, автобекет пен әуежайлардағы қызметкерлердің арнайы нұсқаулық аясындағы атқаруы тиіс іс-шаралары кеңінен сөз болды. Сонымен қатар, осындай фактілердің салдары да талқыланды.

– «Телефон терроризмі» еліміздегі қоғамдық қауіпсіздікке айтарлықтай зиян келтіретін, соңғы уақыттардағы ең көп таралған қылмыстың бірі болып отыр. Еріккендер көп жағдайда жолаушылар нөпірі мол нысандарды нысанаға алады екен. Алайда, оның экономикалық тұрғыдағы зияны аса орасан. Мәселен, орташа есеппен алғанда, ірі қалалардағы бір теміржол вокзалын эвакуациялау шығыны 1 млн теңгедан асады. Сол үшін қоғамдық жолаушы тасымалының қызметкерлері мұндай тосын жайттарға әрдайым даяр болуы қажет, – деді Семей станциясындағы ЖПБ әкімшілік полиция бөлімінің бастығы Рүстем Әбеуов.

Адамдар мұндай жалған хабарларды қандай да бір айқын мақсатсыз немесе спирттік ішімдіктің кесірінен және психологиялық көңіл күй әсерінен жасайды екен. Тіпті, бөтелкелестерімен бәстесіп, «жасырын бомба» қойылғандығы туралы хабарлағандар да тіркелген.

«Бүгінгі күні ішкі істер органдары ұлттық қауіпсіздік органдарымен бірлесіп, осы санаттағы қылмыстарды ашуда біршама тәжірибе жинақтады. Негізінен мұндай қылмыстардың басым көпшілігі дерлік анықталады. Ондай құқықбұзушылыққа барған адамдар қылмыстық жауапкершілікке тартылады», – дейді Семей станциясының ЖІІБ криминалдық полиция бөлімінің жедел уәкілі Еркебұлан Құдайбергенов.