Семейде вокзалдағы қауіптің алдын алу мәселесі қаралды
Абай облысы бойынша меншікті тілші
Транзиттік жүк ағыны мол, жолаушылар нөпірі жыл он екі ай толастамайтын Семей вокзалында террорлық қауіптің алдын алу бағытындағы іс-шаралар ұдайы ұйымдастырылып тұрады.
Шаһар қақпасы саналатын теміржол бекетіндегі күзет пен қадағалау өзіндік тәртіппен жүргізіледі. Онда қызмет атқаратын теміржолшылар теологиялық әрі заңдық тұрғыдағы білімдерін жетілдіріп отырады. Ол не үшін десек, мысалы, жүріс-тұрысы, сырт келбеті күмән тудыратын радикалды бағыттағы жат ағым өкілдерімен сөйлесу және кездейсоқ күдікті зат табылған жағдайда қалай әрекет ету керектігі әр вокзал қызметкері үшін маңызды.
Жуырда осы тақырыпты өзек еткен кезекті дәріс өтті. Оған Семей өңірі бойынша дін мәселелерін зерттеу орталығы секторының меңгерушісі Мақсат Өмірханов пен талдау және ақпараттандыру-түсіндіру бөлімінің маманы Жаслан Слямханов қатысып, теміржолшыларға көп мағлұмат берді. Арнайы дәріс барысында қатысушыларға деректі фильм көрсетіліп, деструктивті діни ағымдардың қоғамға келтірер залалы жайында әңгіме өрбіді.
Вокзал қызметкерлері қоғамдық орындардағы заңсыз миссионерлік әрекет бойынша жауапкершілік және ғибадат рәсімдерін тек белгіленген жерлерде ғана орындау, т.б. мәселелер жөнінде сауалдар жолдап, пікірлерімен бөлісті.
Сонымен қатар, Семей станциясы желілік полиция бөлімінің аға жедел уәкілі, полиция капитаны Еркебұлан Құдайбергенов сөз алып, осы бағытта атқарылуы тиіс жұмыстармен таныстырды.
Жалпы, мұндай танымдық-тағылымдық мәні зор дәрістер бөлімше көлемінде, желі бойындағы мекемелерде жиі ұйымдастырылады. Оның өзі теміржолшылардың кәсіби біліктілігіне оң ықпал етері анық.