Екібастұздағы ТЖ кезінде көрсеткен көмегі үшін теміржолшылар ынталандырылды
Екібастұз қаласында орналасқан «ҚТЖ» ҰК» АҚ филиалдары мен еншілес ұйымдарының барлық қызметкерлері және басқа өңірлерден көмекке жіберілген және жылу желілеріндегі апатты жоюға белсенді қатысқан компанияның еншілес ұйымдар қызметкерлері ынталандырылды. «ҚТЖ» ҰК» АҚ-ның сыйақысымен 2600 жуық қызметкер қамтылды, деп хабарлайды Rail-news.kz.
Теміржол магистралінің қызметкерлерімен өте қиын жағдайда жылумен жабдықтау жүйелерін қалпына келтіру бойынша үлкен жұмыс жүргізілді. Теміржол саласындағы 37 нысанның 14-і шұғыл жөндеуді қажет етті. Темір жол нысандарындағы қалпына келтіру жұмыстарын ҚТЖ бас инженері Батыр Котырев қадағалап тексеріп отырды. ҚТЖ мамандарынан құралған 12 апаттық бригада - еліміздің әр өңірінен келген слесарлар мен дәнекерлеушілер апат салдарын жою үшін Екібастұз қаласына жіберілді. Олар қала тұрғындарына пәтерлерінде, сондай-ақ әлеуметтік мәдени тұрмыстық нысандарында жылумен жабдықтау жүйесін қалпына келтіруге көмек көрсетеді. Бригадалар қажетті құрал-саймандармен және құралдармен жабдықталды және де екі ауысымда – күндіз-түні жұмыс істеді.
Теміржолшылар стратегиялық нысандарды жұмыс режимінде сақтай алды. Олардың ішінде локомотивтерге техникалық қызмет көрсету пункті, жетекші доңғалақ жұптарының тайғанауын жою немесе азайту үшін локомотивке сапарға қажетті құм дайындалатын, сақталатын және кептірілетін құм кептіргіш те бар. Олар өз күштерімен объектілердің ішкі жылыту жүйелерін қалпына келтірді.
Станция, депо, техкеңсе, билет кассалары бөлмелеріндегі температура 5-тен 12 градусқа дейін өзгеріп отырды, қызметкерлер сыртқы киіммен жұмыс істеуіне тура келді. Теміржолшылардың үйлері мен жұмыс орындарын жылыту үшін аймақ кәсіподағы жүздеген жылытқыштар сатып алды.
- Салалық кәсіподақ Арыс, Мақтаарал және Қостанайдағы оқиғалардан кейін зардап шеккен қазақстандықтарға көмектесті. Бұл жолы біз шет қалмадық. Біз ең қажетті заттарды – жылытқыштар, ыстық тамақ сатып алдық және жеткіздік. Астана көшесіндегі орталықтан жылытусыз қалған жеке үйлерде тұратын теміржол кәсіпорындарының зейнеткерлері мен аз қамтылған жұмысшылары үшін біз көмір сатып алдық және жеткізіп бердік, - деп атап өтті Екібастұз жол қашықтығы кәсіподақ комитетінің төрағасы, Орталық кеңес мүшесі Марат Сәдуақасов.
Екібастұз станциясындағы үйлерді жылумен жабдықтауды қалпына келтіру кезінде жақын жерде тұратын тұрғындарды, қалпына келтіру бригадаларының қызметкерлерін, теміржолшылар мен полицейлерді жылытуға төрт жылы вагон орнатылды.
Ағымдағы жылдың 9 желтоқсанындағы жағдай бойынша ҚТЖ қызметкерлерінің пәтерлері мен үйлерінде жылыту жүйелерін қалпына келтіру жұмыстары аяқталып қалды, қалғандары жақын арада қалпына келтіріледі. Сондай-ақ ҚТЖ жұмысшылар бригадалары Екібастұздың тұрғын үй объектілерінде пәтер ішіндегі жылыту жүйелерін қалпына келтіруге көмек көрсетуді жалғастыруда. НОД штабының жұмысы Екібастұз қаласының әкімдігімен және ЖЭО басшылығымен үйлестіре жүргізілуде.