Ақтөбеде Еңбекті қорғау күніне орай қауіпсіздік семинары өтті

Ақтөбелік теміржолшылар дүниежүзілік еңбек қорғау күнін өндірістік қауіпсіздік жөніндегі семинар аясында атап өтті. Шараға Ақтөбе, Орал аймағынан теміржол мекемелерінің еңбек қауіпсіздігіне жауапты мамандары арнайы шақырылды.

«ҚТЖ-Жүк тасымалы» ЖШС Батыс аймақтық филиалы бас инженерінің қатысуымен Дүниежүзілік еңбекті қорғау күніне орай өткізілген шара әдеттегі қалыптасқан ресми форматтан тыс, командалық ойын түріндегі сұрақ-жауаптар аясында ұйымдастырылды. Бұл өз кезегінде қызметкерлердің қызығушылығын арттырып қана қоймай, өз қарым-қабілетін толық көрсетіп, семинарға белсенді түрде қатысуына ықпал етті.  

Семинар өндірісте қаза болған қызметкерлер құрметіне бір минут үнсіздік жариялап еске алудан басталды. Әрі қарай қатысушылар бес топқа бөлініп, берілген тапсырмаларды орындап, өндірісте кездесетін оқыс жағдайды әрекет ету тәртібін көрсету, қауіпсіздік талаптары мен шарттары, оларды сақтау тәртібі бойынша теориядан практикаға дейін білімдерін көрсетті. Техникалық еңбек қорғау инженерлері ой пікірлерімен бөлісті.  

– Дүниежүзілік еңбекті қорғау күні – жыл сайын сәуірдің 28-де атап өтіледі. Теміржолшылар үшін еңбекті қорғау мәселесі үлкен маңызға ие. Сондықтан бұл күннің маңызы зор. Қауіпті жұмыста жүрген әрбір әріптесімізге көңіл бөлуіміз қажет. Өндірістегі оқыс оқиғаларды жоққа шығара алмаймыз. Өкінішке орай жыл сайын әлемде миллиондаған жан оқыс оқиғалар салдарынан көз жұмып немесе кәсіби аурауларға ұшырайды. Сондықтан біздің тарапымыздан техникалық сабақтарды күшейтіп, өндіріс барысында әр жұмысшы қырағылық танытып, еңбек қорғау қағидаларын, ережелерін қатаң сақтау керектігі жөнінде профилактикалық жұмыстарды ұдайы жүргізіп, бақытсыз жағдайдың барынша алдын алуға, мүлдем болдырмауға тырысуымыз керек, – деді бас инженер Жасұлан Рсқалиев.  

Семинар барысында ИСПБ платформасын мекеме басшыларының, еңбек қорғау жөніндегі инженерлердің қаншалықты меңгергенін анықтау мақсатында оқу пысықтау актілері берілген тапсырмаға сай толтырылды және оны ақырына дейін орындады. Өрт сөндірушілер мен медицина қызметкерлерінің теориялық және практикалық бағыттағы баяндамаларының өзі семинар форматына орай жасалды.

Семинар соңында белсенді қатысушылар марапатталып, сертификаттар табысталды.