Темір жол бойындағы ұрлық ізі суымай ашылуда
Абай облысы бойынша меншікті тілші
Теміржол нысандарындағы қауіпсіздік пен қоғамдық тәртіп күн тәртібінен түспейтін өзекті мәселелердің бірі. Бұл орайда Семей ЖТ бөлімшесінің аумағы бойынша жүйелі түрде жұмыстар жүргізіліп жатыр. Ұлттық компания мүлкіне қол сұқпау, жолаушылар құқықтарының қорғалуы мен жүктердің сақталуы, қала берді террорлық қауіпсіздік шаралары қатаң назарда тұр.
Жуырда Семей өңіріне арнайы жұмыс сапарымен келген көліктегі полиция департаментінің бастығы, полиция полковнигі Бақытжан Малыбаев семейлік теміржолшылармен кездесіп, осы өзекті мәселені тақылады. Семей ЖТ бөлімшесінің акт залында филиал директоры Владимир Бабиченко, НЖС-6 басшысы Айдын Шәукежановтардың қатысуымен дөңгелек үстел өтті. Басқосуға сонымен қатар, ӘТЖК Семей филиалы мен көлік прокуроры Абай Әзібаев және Семей және Өскемен станцияларындағы желілік полиция басшылары қатысты.
Өз сөзінде Бақытжан Малыбаев теміржолдағы қауіпсіздікті қамтамасыз ету мақсатында қоғаммен серіктестікте, қоғамдық қауіпсіздікті қамтамасыз етудің 2024-2028 жылдарға арналған тұжырымдамасы жайында түсінік беріп өтті. Сонымен қатар, мемлекет басшысының тікелей тапсырмасымен әзірленген аталмыш жаңа бағдарлама аясындағы тың міндеттемелерді шешу жолында бірлесе әрекет етудің тиімділігі жайында сөз қозғады.
Жиын барысында теміржол саласындағы өзекті мәселелер де сарапқа түсті. Атап айтсақ, желі бойындағы шұғыл тежелу, теміржол мүліктерін ұрлау, теміржолға жер үсті және жер асты жолдарын салу сынды тақырыптар кеңінен талқыланды. Бөлімше басшысы Владимир Бабиченко атқарылып жатқан шаралар мен болашақтағы жоспарларымен бөлісті. Филиал директоры айтып өткендей, қазіргі күндері желілік полиция қызметкерлерімен жұмыс жүйелі жолға қойылған. Соның арқасында бөлімше көлеміндегі жасалынған қылмыстардың барлығы дерлік ізі суымай ашылуда. Бірлескен жұмыстар қатары арнайы әзірленген слайд арқылы көпшілікке көрсетілді. Рас, құқық бұзып, қылмысқа баратындар арасында теміржолшылардың да кездесіп жататыны қынжылтады. Алайда, сұғанақтық жасап, заңнан аттаушыларға кешірім жоқ.
Дөңгелек үстел қорытындысы бойынша теміржолшылар мен желілік полиция қызметкерлері өзара тығыз әріптестік байланысты арттыра түсуге уағдаласты.
Ал, басқосудан соң мәртебелі мейман бөлімше басшыларымен бірге Семей вокзалына арнайы барып, ондағы қоғамдық қауіпсіздік шараларымен танысты. Қазіргі таңда нысан бейнекамералармен толық қамтылған. Террорлық қауіпсіздік те күшейтілген.
