Мобильді машинаның көмегі зор
Абай облысы бойынша меншікті тілші
Желі бойындағы пойыз қозғалысының қауіпсіздігі жан-жақты, сан-салалы тақырып. Бұл ретте бірінші кезекте теміржол бойының техникалық талапқа сай болуы басты назарға алынады.
Биыл Семей ЖТ бөлімшесі бойынша желі бойына жақын өскен ағаштар мен бұталарды кесу, қырқу жұмыстары қарқынды жүргізілуде. Әсіресе, аймақтың шығыс бөлігі жаңбырлы болуы себепті желіге жанаса, қаулай өскен жасыл өскін көп. Одан келер қауіп аз емес. Солардың ішіндегі ең бастысы – орман өрті. Міне, осыны ескерген семейлік теміржолшылар мобильді бұта қырыққыш машинаның көмегімен желі бойында жүйелі жұмыстар жүргізуде. Өткен маусым айында басталған жұмыс содан бері тынбай жүріп жатыр. Бүгінде жалпы ұзындығы 74,3 шақырым болатын жол бойы шырпы-бұтақтардан толықтай тазартылды.
Алдағы қоңыр күзге дейін біршама жұмыс жүргізілмек. Бұл орайдағы еңбек өнімді. Мәселен, өткен бір аптаның ішінде ғана, 6,4 шақырым жолдың бойы қалыпқа келтірілді. Бұл шаралар мұнымен қоса жол бойының күтіміне, эстетикалық әдемілігіне де зор ықпал етеді. Сонымен қатар, жол жөндеу жұмыстарының кедергісіз жүргізілуіне де оңтайлы жағдай жасайды.
Бұта қырыққыш машинаның көмегі зор болып отыр, негізінен локомотив бригадалары мен жолшылардың пікір-өтініштері бірінші кезекте баса ескерілуде.
