Арыстық теміржолшы республикалық байқау жеңімпазы атанды (Фото)
Арыс белгі беру және байланыс саласында ширек ғасыр табанды қызмет атқарып келе жатқан теміржолшы Абдулла Ильясов республикалық байқау жеңімпазы атанды.
Мемлекет басшысы Қ.К.Тоқаевтың «Жаңа Қазақстан: жаңару мен жаңғыру жолы» атты Қазақстан халқына жолдауын қоғамға кеңінен насихаттау мақсатында өткен «Қазақстан Республикасының Құрметті азаматы» атты республикалық байқауға қатысқан арыстық теміржолшы жеңімпаз атанып, І дәрежелі дипломмен және байқаудың төсбелгісімен марапатталды.
Айта кетейік, байқауды ұйымдастырушы «Bilim orkenieti» инновациялық ғылыми-зерттеу орталығы табыс еткен «Қазақстан Республикасының Құрметті азаматы» атты байқаудың төсбелгісі қоғамға қосқан айрықша еңбегі үшін берілді деп атап көрсетілген. Арыс белгі беру және байланыс дистанциясының техникалық бөлім басшысы Абдулла Тайрұлы – кәсібіне деген адалдығына қоса белсенді қоғамдық қызметімен, теміржолшылар қаласы Арысқа деген жанашыр көзқарасымен аудан халқына танымал азамат. Демек, марапат иесін тапты деген сөз.
