Жылыту пункттері – жолшылар игілігінде

Пойыздардың қозғалыс қауіпсіздігін сақтауды арттыруда жол дистанцияларында еңбек ететін жолшылар еңбегі басым. Жыл он екі ай ауа-райының қолайсыздығына да қарамастан жол бойынан табылатын жолшылар үшін жол бойында жылыту пункттері орналастырылуда.  

Кішкентай ғана шағын бұл үйшіктер қыста аяздан, қар мен бораннан қорған болса,  жаздың аптап ыстығында көлеңкелейтін, ас-су ішіп, демалып жан шақыратын пана болмақ.    

Жалпы бөлімше бойынша Шорнақ пен Сексеуіл станциялары арасындағы жол бойына жол дистанциясының жұмысшылары үшін 66  жылыту пукті пайдалануға берілуі жоспарланған екен. Қызылорда магистральдық желі бөлімшесінің бас инженері Берік Бекжанов жол дистанцияларына берілген осынау жылыту пункттерін орналастыру жоспар бойынша жүргізіліп жатқанын білдірді.

– Түзде жүретін теміржолшыларға арналған жылыну  пукттерін орналастыру жұмыстары бүгінде қарқынды жүргізіліп жатыр. Қазіргі таңда Қызылорда жол дистанциясы телімдерінде жоспарланған 15 дана, Қазалы жол дистанциясы бөлінген 21 дана пункттің 14-і орналастырылып, пайдалануға берілді. Ал Сексеуіл жол дистанциясына бөлінген 30 жылыту пункті тасымалдануда, олар дистанция телімдеріне жеткізіліп берілген соң орналастырылатын болады,– деді магистральдық желі бөлімшесінің бас инженері Берік Бекжанов.

Қызылорда жол дистанциясының телімдерінің бірі  Қызылорда – Белкөл станциясы аралығында жұмыс жасайтын телім жолшыларымен жылыту пункттерінің бірінде жолықтық. Жолдың бабын жасайтын жолшылар үшін қойылған жылыту пункті қыста пешпен жылытылады, ішіне үстел мен орындық қойылған екен. Көлемі шағын болғанмен жолшылар үшін хан сарайындай көрінетін нысанның іші ұядай жинақы, әр зат өз орнында тұр. Қыста суықтан қорғанатын жылы орын болса,   жазда көлеңкелейтін пана болмақшы.  

Жылыту пунктінің жанына жолға күнделікті күтім жасауға арналған құрал-саймандарды сақтайтын құралхана да жасақталыпты. Яғни ендігі жерде жол күтімін жасайтын жолшылар жұмыс соңында құрал-саймандарын арқалап тасымай-ақ осы жерде сақтайтын болады.