Ресейде push-pull технологиясымен жүретін алғашқы қала маңы пойызы іске қосылады
Ресейде push-pull, яғни «итеріп-тарту» жүйесімен жұмыс істейтін алғашқы қала маңы пойызы жыл соңына дейін жолаушылар тасымалына шығады, деп хабарлайды Rail-news.kz.
Санкт-Петербург қаласында Ресей темір жолдары (РЖД) мен «Трансмашхолдинг» компаниясы ДП2Д сериялы жаңа пойызды таныстырды.
Жаңа құрам ТЭП70БС тепловозы мен «Скворец» электр пойызының вагондарынан жасақталған. Оның басты ерекшелігі – қозғалыс бағытына қарай пойызды тепловоз кабинасынан да, құрамның бас жағындағы вагоннан да басқаруға болады.
Бұл технология бағыт ауыстырған кезде локомотивті қайта тіркеу және маневр жасау операцияларын азайтады. Соның нәтижесінде пойыз қозғалысын ұйымдастыру жеңілдеп, жолаушылардың жолға кететін уақыты қысқаруы мүмкін.
РЖД басшысының орынбасары Иван Колесниковтың айтуынша, ДП2Д пойызын жыл соңына дейін Санкт-Петербург – Ивангород бағытына шығару жоспарланып отыр.
Алты вагоннан тұратын құрамда алты жүзден астам отыратын орын бар. Оның ішінде қозғалысы шектеулі жолаушыларға арналған орындар да қарастырылған. Сонымен қатар пойыз климаттық бақылау жүйесімен, санитарлық тораппен, жүк сөрелерімен және мобильді құрылғыларды қуаттауға арналған қосқыштармен жабдықталған.
Қазір Санкт-Петербург – Ивангород бағыты бойынша күн сайын үш вагоннан тұратын пойыздар қатынайды. Бұл бағытта жолаушылар ағыны да артып келеді. Жыл басынан бері аталған бағытта тоғыз мың жүз адам тасымалданған. Бұл 2025 жылдың сәйкес кезеңімен салыстырғанда тоғыз пайызға көп.
