Өрт сөндірушілер төтенше жағдайға дайындықтарын пысықтады

Ақмола облысының Ақкөл ауданы аумағында орман және дала өрттерін сөндіру бойынша «Орман-дала 2023» республикалық ауқымды командалық-штабтық оқу-жаттығуы өтті.

«Ақмола облысының Төтенше жағдайлар департаментінің, жергілікті атқарушы органдардың, авариялық-құтқару қызметтерінің және әскерилендірілмеген өртке қарсы құрылымдардың өзара іс-қимылын пысықтау. Табиғи өрттерді жою кезіндегі практикалық іс-қимылдарды пысықтау» деген тақырыпта өткен іс-шараға теміржолшылар да атсалысты.  

Шартты сценарий бойынша ауыл маңындағы орманнан бірнеше жерде өрт тұтанып, бұл туралы Ақмола облысының төтенше жағдай департаменті мен өзге де тиісті құрылымдар, соның ішінде ҚТЖ өкілдері де хабардар етіліп, бәрі өртті ауыздықтауға жұмылдырылды.  

– Оқу-жаттығу шарасы аясында біздің өрт сөндіру пойыздарымыздың дайындығы сынға түсті. Өрт сөндіру автокөліктеріне су қажеттілігі туындағанда олар қосымша көмекке келуге әзір тұрды. Бізде облыстың төтенше жағдайлар департаментімен бірлескен өзара іс-қимыл жоспары бар. Жалпы Ақмола жол бөлімшесіне қарасты 5 өрт сөндіру пойызы жұмыс істеп тұр. Оларда 50 текше метр су сыятын 2 цистерна және 1 вагон сорғы бар, көбік шашатын құралдар да жеткілікті. Өрт сөндіру пойыздарымыз Астана, Бурабай курорты, Атбасар, Көкшетау, Жаңаесіл станцияларында орналасқан. Өрт шыға қалған жағдайда шұғыл көмекке әрқашан дайын, олардың жарамдылығы ауысым сайын тексеріліп отырады. Бізде жылдық, тоқсандық, жоспардан тыс оқу-жаттығулары да өткізіледі. Олардың тақырыптары әр түрлі, бірде локомотивтен шыққан өртті сөндірсек, екінші ретте теміржол бойында орналасқан әлеуметтік нысандарда тұтанған қызыл жалынды ауыздықтаймыз, – дейді Ақмола магистральдық желі дирекциясы Ақмола мемлекеттік өртке қарсы қызмет бастығының техникалық материалдық жабдықтау жөніндегі көмекшісі Айдын Байжокин.  

Елімізде бірнеше рет ірі орман өрттері болғанын ескерсек, бұл оқу-жаттығудың маңызы зор екені айтпаса да түсінікті.  

– Теміржол бойына жақын орналасқан Ақкөл ауылының маңындағы орманда тұтанған өрт теміржол қозғалысына да қауіп төндіреді. Оны ауыздықтау барысында мемлекеттік өртке қарсы қызмет органдарына көмекке келуге теміржолдың өрт сөндіру пойыздары дайын тұрды. Өрт сөндіру қызметіне қоса Ақкөл станциясы мен осындағы ШЧ, ПЧ, ЭЧ мекемелерінің жұмысшылары да өрт аумағына келіп, тілсіз жау ауыздықталған соң өз саласы бойынша қызметтерге қаншалықты залал келгенін анықтап, оларды жоюға кіріседі. Жалпы мұндай республикалық ауқымдағы оқу-жаттығу шараларының өртке қарсы қызметтердің кемшіліктерін түзеп, дайындықтарын шыңдауда берері көп. Ірі орман өртін жоюда ҚТЖ-да құрылған штабтың іс-қимылына да баға берілетін болады, – дейді ҚТЖ-ның Ақмола өртке қарсы қызметі бастығының міндетін атқарушы Жанат Әбуов.  

Оқу-жаттығу барысында Ақкөл станциясының бастығы Нұрбол Назаров та мұндай төтенше жағдай орын алғанда станция атынан қандай көмек көрсетілетінін жеткізді.  

– Мұндай кезде біздің басты міндетіміз – теміржол бойына өрт сөндіру пойызын дер кезінде қабылдап, оны іске қосу және жергілікті мамандармен бірге өрт сөндіруге жұмылу. Сонымен қатар өрт сөндіру мәселесі бойынша штабтық ұйымдарда тізе біріктіре жұмыс істеп, станциядағы құрылымдық бөлімшелерді әкімдік тарапы ұсынған өрт сөндіру жұмыстарына тартуға күш саламыз, – дейді станция бастығы.  

Оқу-жаттығуға төтенше жағдайлар вице-министрі, генерал-майор Ерлан Нұрпейісов, ҚР экология және табиғи ресурстар бірінші вице-министрі Нұркен Шарбиев, Астана, Қарағанды қалалары мен Ақмола облысы ТЖ департаменттерінің қызметкерлері мен әкімдік өкілдері қатысты. Шартты орман өртін сөндіруге барлығы 250-ден астам адам, 100 техника мен 5 тікұшақ жұмылдырылды.