Еліміз үшін елеулі күн
Қазан айының 25-інде Қазақстан халқы Республика күнін ұлттық мереке ретінде биыл екінші жыл тойлағалы отыр. Ұзақ жылдар бойы ұмыт қалған аталмыш мейрам еліміздің тарихы үшін елеулі, маңызы зор күн.
Республика күнінің тарихы тереңде жатыр. Отыз үш жыл бұрын Қазақстанның тәуелсіздік алуына жол ашқан маңызды құжат «Қазақ КСР-нің мемлекеттік егемендігі туралы» декларация қабылданды. Құжатта Қазақ елінің тәуелсіз мемлекет ретіндегі саяси-құқықтық негіздері жарияланып, еліміздің аумағы, азаматтығы, мемлекеттік бюджеті мен рәміздері бекітілді.
Қазақстан тәуелсіздік алған сәттен бастап ұлттық мереке әр қазанның 25-сі аталып өтілсе, 2009 жылы мереке қатарынан мүлдем алынып тасталды. Араға он жылдан астам уақыт салып, Республика күні еліміздің басшысы Қасым-Жомарт Тоқаев бастамасымен «ұлттық мереке» мәртебесіне ие болды.
«Қайта жаңғырған Республика күні – бұл халқымыздың рухын көтеріп, елдігімізді нығайта түсетін аса маңызды тарихи қадам», – деп айтқан болатын өз сөзінде еліміздің басшысы Қасым-Жомарт Тоқаев.
Бүгінде бұл мереке жұртымыздың рухын көтеріп, ынтымағымызды арттыратын айшықты күн. Ата-бабаларымыз ұзақ жылдар бойы аңсаған тәуелсіздікке бүгінде біз қол жеткізіп отырмыз. Бостандық жолында қолға найза алып, тұлпар үстінен түспеген батырларымыз қиындыққа мойымай бұл күнді ғасырлап күтті. Демек, бүгінгі күн азаттық үшін күрескен бабалар арманы орындалды деген сөз. Қанмен, термен келген еркіндікті сақтап қалу біздің ендігі міндетіміз екендігін естен шығармайық.
Ербол Құлбаев,
Қазақстан Республикасы Бас прокуратурасының
Құқықтық стастика және арнайы есепке алу жөніндегі
Комитетінің Көліктегі департаментінің бастығы