Гендерлік тақырыпта тренинг өтуде

ҚТЖ-да Біріккен ұлттар ұйымының Қазақстандағы Даму Бағдарламасының Тұрақты өкілдігімен ынтымақтастық шеңберінде «Гендерлік теңдік» және «Қызметте әйелдерге тиісуге қарсы мәдениет» тақырыбында тренингтер өткізілуде. 

24 қазан мен 14 қараша аралығында өтетін тренингтерді БҰҰДБ гендерлік теңдік жөніндегі кеңесшісі Гаухар Нұрша және осы бағдарламаның гендерлік сертификация жобасының менеджері Ақниетті Әлиева жүргізуде. 

Алғашқы тренингке қатысқан компания қызметкерлеріне іс-шараның бағдарламасы бойынша топпен жұмыс істеу, кейстерді талдау, сұрақ-жауап тапсырмалары берілді. Қатысушылар гендер дегеніміз не, оның қазіргі адамдар үшін маңыздылығы неде деген сұрақтарға жауап іздеді. Сонымен қатар ауылдық және қалалық жерлерде ерлер мен әйелдерден қоғам не күтеді, олардың арасындағы айырмашылық неде, нақты мынау ердің, мынау әйелдің ғана мамандығы деп бөлуге бола ма деген сынды көптеген сауалдар қойылып, топқа бөлінген қатысушылар соған өзінше жауап табуға тырысты. «Әйелдерге қарағанда ерлер саяси көшбасшы немесе бизнес жетекші рөліне жақсырақ келеді» деген тақырыпта да пікірталас ұйымдастырылды. 

– Гендерлік теңдік ерлер мен әйелдер бірдей дегенді білдірмейді. Бұл сөз ерлер де, әйелдер де жынысына қарамай түрлі құқықтарға, мүмкіндіктерге, ресурстарға бірдей қолжетімділікке ие дегенді білдіреді. Осы тақырып аясында ҚТЖ-ның Орталық аппаратына қарасты департаменттерінде қызмет ететін әйелдер ой бөлісіп, алғашқы тренингтің жұмысына қатысты. Компанияның кітапханасында өткен тренингтер келесі айдың ортасына дейін жалғасып, басқа да қамтылмаған теміржол мамандардың белсенділігін арттыратын болады.