Ардагерлер елордада бас қосты
«Қазақстан теміржолшысы» газетінің тілшісі
«ҚТЖ» ҰК» АҚ теміржолшы ардагерлер кеңесіне биыл 10 жыл толып отыр. Айтулы датаға орай елордада өткен салтанатты шараға өңірлердегі филиалдар төрағалары келді.
ҚТЖ ғимаратында бас қосқан ардагерлерді компания басқарма төрағасының орынбасары Қанат Әлмағамбетов пен «Қазкөліккәсіп» ҚБ төрағасы Оразғали Ахметбаев арнайы құттықтады. 2013 жылы 12 желтоқсанда құрылған ардагерлер кеңесі құрамында бүгінде 48 мың зейнеткер теміржолшы бар. Жиын барысында компания өмірінде сала ардагерлерінің алатын орны мен маңызы сөз болды.
– Келесі жылы Қазақстанда темір жол пайда болғанына 120 жыл толады. Жалпы ардагерлердің кейінгі жастарды тәрбиелеу, ұрпақтар сабақтастығын дамыту, теміржолдың тарихын жазу, мұражайларды құру ісінде еңбегі зор. Музейлердің көбі осы ардагер теміржолшылардың күшімен жасақталған. Жаңа жылдан бастап жаңа Ұжымдық шарт қабылданады, онда сіздердің жолдаған ұсыныстарыңыз ескерілді. Ардагерлердің теміржолға сіңіріп жатқан еңбегі әлі де көп, алдағы уақытта да сіздердің ақыл-кеңестеріңіз бізге керек, – деді Оразғали Ахметбаев.
Ардагер теміржолшы Куаныш Котырев кеңес тарихы мен даму жолы туралы баяндап, қазіргі таңдағы түйінді мәселелер шешімі бойынша ұсыныстар берді. Зейнетке шыққан теміржолшыларға көрсетілетін көмек пен берілетін материалдық қолдау туралы толық ақпарат берілді. Қ. Әлмағамбетов ардагерлерді компания басшылығы бастамасымен арнайы жасалған 10 жылдық төсбелгісімен марапаттады. Іс-шара аясында ардагерлер ҚТЖ-ның бас ғимаратындағы музейді және қаланың көрікті жерлерін аралады.