Мемлекеттік тілге құрмет: ҚТЖ-Жүк тасымалы челлендж өткізуде
«Қазақстан теміржолшысы» газетінің тілшісі
Мемлекеттік тілдің қолданылу аясын кеңейту, ана тіліне деген құрметті арттыру мақсатында «ҚТЖ-Жүк тасымалы» ЖШС басшылығының бастамасымен «Әр сөз маңызды!» челленджі өтіп жатыр.
Челленджді бірінші болып серіктестіктің Орталық аппараты бастап, одан соң Ақмола ЖТ бөлімшесі үн қатып, Маңғыстау, Ақтөбе, Семей, Қарағанды ЖТ бөлімшелері іліп алып кетті. Қарашада басталған челленджге қазіргі таңда серіктестіктің вагон және локомотив пайдалану деполары да қосылып, әр аптаның сәрсенбісі теміржолшылар бір-біріне челлендж жолдап, оны компанияның әлеуметтік желідегі ортақ аккаунттарына салып таратуда.
Серіктестіктің Адами ресурстарды басқару және әлеуметтік саясат департаментінің бас менеджері Мейрамгүл Ахметованың айтуынша, бұл бастаманы көтерген – бас директордың корпоративтік мәселелер жөніндегі орынбасары Владимир Бабиченко. 1-3 минут аралығындағы бейнероликте әр мекеме қызметкерлері ұлттық киіммен тұрып, қазақтың белгілі ақындарының өлеңдерін оқиды да, челленджді өздері қалаған ұжымға жолдайды.
– Компанияның мемлекеттік тіл саясаты аясындағы жұмыстары бойынша біздің серіктестіктің өз бастамасымен әр аптаның сәрсенбі күнін «Мемлекеттік тіл күні» деп жариялаған едік. Челлендждер әр сәрсенбі таңертең 9.00-ден бастап таралады. Сәрсенбі сондай-ақ ұлттық киім киіп келу, тек қазақша сөйлеуге басымдық беріледі. Одан бөлек құжат айналымындағы мемлекеттік тілдің үлесін 91%-ға жеткізуі бойынша мемлекеттік тілдің қолданылуын және заңнама талаптарына сәйкес болуын қамтамасыз ету бойынша жұмыстар да бастама алып жатыр, – дейді М.Ахметова.
Серіктестікте сонымен қатар «ҚТЖ» ҰК» АҚ «Көп функционалды қызмет көрсету орталығы» филиалы Мемлекеттік тілді дамыту секторының биылғы 24 қазандағы № ЦЗК/6966 хаттамасына байланысты қазақ тілінің қолдану белсенділігін арттыру жұмыстары жүргізілуде.
– ЖШМ бойынша құжаттарды мемлекеттік тілде орындауға басымдық беруді талап ету жайлы және мемлекеттік тіл саясатын іске асыратын жауапты маман тағайындау бойынша тапсырма барлық департаменттер және филиал бөлімшелеріне жіберілді. Серіктестік аумағында құжат айналымының мемлекеттік тілде жүргізілуі тұрақты түрде бақыланып отыратын болады, сонымен қатар департаменттер және филиал бөлімшелері бойынша мемлекеттік тілде жіберілетін құжаттардың көлемі жөнінен ақпаратты әр айдың бірінші аптасында есепке алып, талдау жұмыстары жүргізіледі. Қызметкерлерді ынталандыру жұмыстары қарқынды бастама алды, – дейді бас менеджер.
Сондай-ақ Мемлекеттік тілді дамыту секторы бекіткен Алаш қайраткерлері жөніндегі фильмдерді бөлімшелердегі басшылар мен қызметкерлердің көріп, талқылауы туралы тапсырма барлық департаменттер және филиал бөлімшелеріне жіберілген. Оның ішінде қазақ тіліндегі 45 тарихи фильм бар.