ESG-мәдениетін дамыту хақында

Форум аясында «Жастардың ESG-мәдениетін дамытуға әсері» панельдік талқылауы өтті.

ҚТЖ-ның Әлеуметтік саясат департаментінің бас менеджері Замир Серіков модераторлық етіп, спикерлер ретінде «Самұрық-Қазына» АҚ Әлеуметтік өзара ықпалдастық және коммуникациялар орталығының бас директоры Елдос Өмірзақов, «ҚТЖ» ҰК» АҚ Адами ресурстарды басқару департаментінің директоры Сәуле Истлеева, «ҚТЖ-Жүк тасымалы» ЖШС бас директорының орынбасары – бас инженері Мәрлен Көкірекбаев, «Бизнесті трансформациялау орталығы» филиалының директоры Марат Жайықбаев қатысқан жиын танымдық тұрғыда өрбіді. Модератор спикерлерге жеке-жеке сұрақ қойып, тақырыптар талқылауға ұласты. 

«ESG аббревиатурасы «экологиялық, әлеуметтік және корпоративтік басқару» дегенді білдіреді. Кең мағынада бұл келесі принциптерге негізделген: коммерциялық қызметтің тұрақты дамуы: қоршаған ортаға жауапкершілікпен қарау (ағылшын, Е – қоршаған орта); жоғары әлеуметтік жауапкершілік (ағылшын, S – әлеуметтік); корпоративтік басқарудың жоғары сапасы (ағылшынша, G – governance). 

«Қазіргі түрінде ESG қағидаттарын алғаш рет БҰҰ-ның бұрынғы Бас хатшысы Кофи Аннан тұжырымдаған. Ол ірі жаһандық компаниялардың менеджерлерін осы принциптерді өз стратегияларына, ең алдымен климаттың өзгеруіне қарсы тұруға қосуға шақырды. Қазір бұл принциптер Қазақстанның мемлекеттік және квазимемлекеттік секторларымен қатар «ҚТЖ» ҰК» АҚ-ның ірі бизнес компанияларына да енгізіліп отыр», – деп түсінік берген модератор алғашқы сұрақты Самұрық-Қазына өкілі Елдос Өмірзақұлына бағыттады. «Қор пайымында ESG деген не? Және ол біз үшін қаншалықты маңызды?» деген сауалға байланысты спикер Самұрық-Қазына қорында ESG принцитерін енгізу бағытында жүргізіп жатқан жұмыстар жөнінде мағлұмат берді. «ESG принциптерінің бірі – ашықтық. Біз Қордың портфельдік компанияларына осы ESG принциптерін, басқа да халықаралық дағдыларды енгізіп жатырмыз. Әсіресе ESGдің қазір біз S, яғни әлеуметтік бағытындағы принциптеріне айрықша тоқталып, осы бағытта әртүрлі жұмыстар жүргізіп жатырмыз. Жалпы біз қандай жағдайда ESG принциптерін сақтай аламыз? Жұмыс беруші де, жұмысшы да еңбек қауіпсіздігін, еңбектің қорғалуын сақтап, қоршаған ортаны ластамауға мүдделі болса, өз қызметтеріне жауапкершілік танытса, мұның бәрі жалпақ тілмен айтқанда ESG-нің принциптерінің сақталғаны» деді ол. 

Модератордың келесі сауалы «ҚТЖ» компаниясындағы гендерлік саясатқа байланысты Сәуле Машурқызына жолданды. Гендерлік саясатқа қатысты компания ұстанымын білдірген спикердің айтуынша, гендерлік теңдік әйел адамдардың мүмкіндіктерінің шектелмеуін, олардың билікте, саясатта, қаржы, өндіріс секторларында және тағысын тағы салаларда өсуін, олардың да өз ойларын ашық жеткізуін, идеяларын айтуы сияқты принциптерді қарастырады. «Сіздерге де бірбіріңізді сыйлап, жұмыс барысында әріптес қыз-келіншектердің пікірлеріне, идеяларына құлақ асып, олардың қызметтік сатыда өсуіне қолдау білдірулеріңізге тілектеспін» деп сөзін аяқтады С. Истлеева. 

ЕSG приницптерінің бірі – қоршаған ортаны қорғауға байланысты сауалға Марлен Көкірекбаев жауап берді. Айтуынша, «ҚТЖ» компаниясы қоршаған ортаның ластануын мейлінше төмендетуге айрықша мән беріп отыр. Бұл бағытта жыл сайын іс-шаралар жоспары түзіліп, ауқымды жұмыстар атқарылуда. Экологиялық айлықтар ұйымдастырылады. Локомотив парктерінің жаңартылуы да осы экологияға зиянды шығарындыларды азайта түспек. Келешекте тепловоздардың жанар-жағармайды емес, сутегіні қолданып жүруі сияқты әлемдік тәжірибелері де қарастырылуда. 

Модератордың айтуынша, «ҚТЖ» ҰК» АҚ-ны көліктік-логистикалық компанияға трансформациялау барысында жаңа трансформациялық процестер ESG-нің принциптерімен біріктіріледі, осы тұрғыда қандай жаңа процестер ҚТЖ-ға сын-тегеуріндер болатынын «Бизнесті трансформациялау орталығы» филиалының директоры Марат Жайықбаев түсіндіріп берді. Ол осы бағытта атқарылып жатқан жұмыстарға тоқтала келіп, талантты жастарды өз өңірлерінде трансформациялау жұмыстарын алға жылжытуға, бірлесіп жұмыс істеуге шақырды.