Ауа райының қолайсыздығында теміржол штаттық режимде жұмыс істейді
Өткен тәулікте рекордтық қалың қар мен боран теміржол көлігі жұмысына әсер ете қойған жоқ. Қазақстанның Солтүстік, Орталық және Шығыс өңірлерін қуатты қар циклоны қамтыды.
Қазақстанның жекелеген өңірлерінде екпіні секундына 30 метрден асатын нормадан жоғары жауған қар мен қатты желге қарамастан, ҚТЖ қызметкерлері жолаушылар және жүк пойыздарының үздіксіз қозғалысын қамтамасыз ету үшін қолдан келгеннің бәрін жасады.
Темір жолда қар тазалайтын техника тәулік бойы жұмыс істеді және жолаушылар пойыздары өтпес бұрын жолды алдын ала тазартып отырды.
8-10 қаңтар аралығында 19 640 текше метр қар шығарылып, 7 800 шақырымнан астам жол тазартылды. Темір жол инфрақұрылымын қардан тазарту жұмыстарына 123 бірлік мамандандырылған қар тазалау және қардан аршу техникасы және 4 810 жуық қызметкер жұмылдырылды.