Жоғары сынып оқушыларына көлік саласы бойынша бағдар берілді
Қазақстан Республикасының Көлік министрлігі 20-24 мамыр аралығында жоғары сынып оқушыларын көлік саласындағы кәсіптермен жіті таныстыру үшін әрі түлектерді көлік мамандығын таңдауға шақыру мақсатында қалалық, аудандық және ауылдық мектептердің 9-11 сынып түлектері арасында кәсіби бағдар беру бойынша жұмыстарды ұйымдастырды, деп хабарлайды Rail-news.kz.
Аталған кездесулерде сала сарапшылары теміржол, авиация, теңіз саласы және автомобиль көлігіндегі өз тәжірибелерімен бөлісті.
Көлік мамандарын даярлайтын жоғары оқу орындары мен колледждердің өкілдері логистика, авиация, теміржол, теңіз және автомобиль көлігінде жұмыс істейтін мамандарды даярлауға бағытталған мемлекеттік гранттар мен оқыту бағдарламалары туралы ақпаратпен бөлісті. Сонымен қатар қорытынды емтихандарға дайындалу, курстар мен бағдарламаларды таңдау, тағылымдамалар мен тәжірибелік сабақтардың мүмкіндіктері туралы кеңестер берілді.
Кездесулер ашық диалог форматында өтіп, мектеп түлектері үшін көлік әлеміне қатысты жолдаған сұрақтарына жауап алу мүмкіндігі туды.
Жиынға көлік саласының сарапшылары ретінде «ҚТЖ» ҰК» АҚ, әуе компаниялары, Қазаэронавигация, Қазавтожол, Қазақтеңізкөлікфлоты, «Жол активтері сапасының ұлттық орталығы» РМК, Қазақтеңізкөлікфлоты, әуежайлар, «ҚазжолҒЗИ» АҚ, Қазақстан су жолдары, жолаушылар мен жүктердің автомобиль тасымалдаушылары сияқты көлік саласының жетекші компанияларының қызметкерлері қатысты.
Сондай-ақ мектеп түлектерінің назарына Логистика және көлік академиясы, Азаматтық авиация академиясы, Л.Гончаров атындағы Қазақ автомобиль-жол институты, Д.Серікбаев атындағы Шығыс Қазақстан техникалық университеті, Халықаралық көлік-гуманитарлық университеті, С.Сейфуллин атындағы Қазақ агротехникалық университеті, Алматы менеджмент университеті, Ш.Есенов атындағы Каспий технологиялар және инжиниринг университеті мен басқа да оқу орындары туралы ақпарат ұсынылды.
Осыған байланысты ҚР Көлік министрлігі Ғылым және жоғары білім министрлігімен бірлесе отырып, аталған мамандықтар бойынша берілетін гранттар санын ұлғайту бойынша тұрақты жұмыс жүргізіп келеді. Мәселен, елімізде «Көлік құрылысы» мамандығы бойынша жеке бағдарлама қайта жанданды. Бұрын-соңды жүргізілген талдауға сәйкес, қазір жол саласында 1,5 мыңға жуық маман жетіспейді. Осылайша, автожол саласындағы кадр тапшылығының жүйелі проблемаларының бірін шешу үшін білікті жолшыларды даярлау бағытына биыл мыңға жуық мемлекеттік білім беру гранты бөлінеді.