28 мыңнан астам азамат белгіленбеген жерлерден темір жолдарды кесіп өткені үшін әкімшілік жауапкершілікке тартылды
Осы жылдың басынан бері Көліктегі полиция департаментімен белгіленбеген жерлерден темір жолдарды кесіп өткені үшін 28 589 тұлға әкімшілік жауапкершілікке тартылды, деп хабарлайды Rail-news.kz.
Пойыздардың шұғыл тежеу фактілері жалғасуда, жыл басынан бері 1268 дерек тіркелді, оның ішінде адамдардың болуына байланысты – 205, жануарлардың болуына байланысты – 956 және т. б.
55 азамат пойыз астына түсіп, олардың жартысынан көбі қайтыс болды. Бұл туралы Департамент бастығы Бақытжан Малыбаев мәлімдеді.
Оның айтуынша, демалыс күндері Жетісу облысы «Қарабұлақ-Талдықорған» аралығында жүк пойызы белгіленбеген жерден темір жолды кесіп өтіп бара жатқан ер адамды қағып кетті. Ол алған жарақаттарынан сол жерде көз жұмды. Қылмыстық іс қозғалып, тергеу жүргізілуде.
«Өкінішке орай, қайғылы оқиғалардың көпшілігі темір жолда жүріп-тұру ережелерін сақтамау салдарынан болады. Әлі күнге дейін адамдар теміржолдың қаншалықты қауіпті аймақ екендігін, оның зардаптарын жете түсінбейді», - деді полиция полковнигі.
Сондай-ақ, ол көлік полицейлері профилактикалық іс-шараларды жүргізу кезінде азаматтарға теміржолда болған кезде қауіпсіздік ережелерін қатаң сақтау туралы түсіндіретінін атап өтті.
Көлік полициясы азаматтарға теміржолда мұқият болу керектігін ескертеді. Жаяу жүргіншілердің төсем арқылы өтпес бұрын темір жолда пойыздың, локомотивтің немесе вагондардың жоқтығына әбден көз жеткізгендері жөн. Тіпті, пойыздың сигналын есту үшін құлаққап пен капюшонды шешіп өту өте маңызды.